రవీంద్రభారతి, జూలై 10: పార్లమెంట్లో బీసీ బిల్లు ప్రవేశపెట్టి చట్టసభలో బీసీలకు 50శాతం రిజర్వేషన్లు కల్పించాలని జాతీయ బీసీ సంక్షేమ సంఘం జాతీయ అధ్యక్షుడు ఆర్ కృష్ణయ్య కేంద్రప్రభుత్వాన్ని డిమాండ్ చేశారు. కలిసికట్టుగా బీసీ సంఘాల హక్కుల కోసం పోరాడాలని పిలుపునిచ్చారు. బుధవారం బషీర్బాగ్ ప్రెస్క్లబ్లో బీసీ మేధోమథన సదస్సు సంఘం రాష్ట్ర కన్వీనర్ లాల్కృష్ణ అధ్యక్షతన జరిగింది. ఈ సదస్సుకు పలు యూనివర్సిటీల ప్రొఫెసర్లు, 28 బీసీ సంఘాలు, 36 కుల సంఘాలు, 48 ఉద్యోగ సంఘాల నాయకులు హాజరయ్యారు. పలు తీర్మానాలను ఏకగ్రీవంగా ఆమోదించారు. ఈ సందర్భంగా ఆర్ కృష్ణయ్య మాట్లాడుతూ.. కేంద్రప్రభుత్వ శాఖలలో, ప్రభుత్వ రంగ సంస్థలలో ఖాళీగా ఉన్న 16 లక్షల ఉద్యోగ ఖాళీలు భర్తీ చేయాలని డిమాండ్ చేశారు. పంచాయతీరాజ్ సంస్థలో బీసీ రిజర్వేషన్లను 34శాతం నుంచి 52 శాతానికి పెంచిన తరువాత ఎన్నికలు నిర్వహించాలని సీఎం రేవంత్రెడ్డికి సూచించారు. అసెంబ్లీ, పార్లమెంట్ సీట్లను 100శాతం పెంచాలని పేర్కొన్నారు. కార్యక్రమంలో బీసీ సంక్షేమ సంఘం జాతీయ ఉపాధ్యక్షుడు గుజ్జ కృష్ణ, కాంగ్రెస్ మాజీ రాజ్యసభ సభ్యుడు వీ హన్మంతరావు, నీల వెంకటేశ్, ఎర్ర సత్యనారాయణ, మల్లేశ్యాదవ్, రామకృష్ణ, అనంతయ్య పాల్గొన్నారు.