సిటీ బ్యూరో(నమస్తే తెలంగాణ): ఆంధ్రప్రదేశ్లోని విశాఖలో ప్రారంభానికి ముందే వందేభారత్ రైలుపై రాళ్లదాడి జరిగింది. ట్రయల్ రన్ తర్వాత విశాఖపట్నం నుంచి మర్రిపాలెంలోని కోచ్ నిర్వహణ కేంద్రానికి రైలు వెళ్తున్నప్పుడు ఈ ఘటన చోటు చేసుకుంది. సికింద్రాబాద్-విశాఖపట్నం మధ్య నడిచే ఈ రైలును ఈ నెల 15న ప్రధాని నరేంద్రమోదీ వర్చువల్గా ప్రారంభించనున్నారు. షెడ్యూల్ ప్రకారం 19న ఈ ప్రారంభోత్సవం జరుగాల్సి ఉండగా, పండుగ సమయంలో ప్రారంభించే యోచనతో నాలుగు రోజుల ముందే ప్రారంభించనున్నారు. ఈ రైలు సికింద్రాబాద్ నుంచి బయలుదేరి వరంగల్, ఖమ్మం, విజయవాడ, రాజమండ్రి మీదుగా ఎనిమిది గంటల్లో విశాఖపట్నం చేరుకుంటుంది. మరోవైపు, సోమవారం నాగ్పూర్-బిలాస్పూర్ మార్గంలోని వందే భారత్ రైలును పశువులు ఢీ కొన్నాయి. దీంతో రైలు ముందు భాగం దెబ్బతింది.