హైదరాబాద్, జూలై 14(నమస్తే తెలంగాణ): అనర్హుల పేరుతో ఆసరా పెన్షన్లను రికవరీ చేయాలన్న నిర్ణయంపై ప్రభుత్వం తాత్కాలికంగా వెనక్కు తగ్గింది. దీనిపై స్పష్టమైన మార్గరద్శకాలు వెలువడే వరకు ఎటువంటి నోటీసులు జారీచేయడం కానీ, రికవరీ చర్యలు చేపట్టడం కానీ చేయరాదని రాష్ట్ర ప్రభుత్వ ప్రధాన కార్యదర్శి శాంతికుమారి జిల్లా కలెక్టర్లు, వివిధ శాఖల అధికారులను ఆదేశిస్తూ ఆదివారం ఉత్తర్వులు జారీచేశారు. సంక్షేమ పథకాల ద్వారా అనర్హులు లబ్ధిపొందుతున్న అంశంపై ప్రభుత్వం తదుపరి ఉత్తర్వులు ఇచ్చేవరకు ఎటువంటి రికవరీ చర్యలు చేపట్టరాదని స్పష్టంచేశారు. వివిధ సంక్షేమ పథకాల్లో అనర్హులు లబ్ధ్దిపొందుతున్నట్టు ప్రభుత్వం దృష్టికి వచ్చిందని పేర్కొన్నారు. అర్హులైన లబ్ధిదారులకు మరింత మెరుగైన పద్ధతుల్లో సంక్షేమ కార్యక్రమాలను అమలు చేసేందుకు సంప్రదింపులు చేపట్టినట్టు తెలిపారు.
సంక్షేమ పథకాల్లోని వివిధ సమస్యలు, వాటి పరిష్కారాలపై వచ్చే శాసనసభ సమావేశాల్లో చర్చించనున్నట్టు వెల్లడించారు. నిజమైన లబ్ధిదారులకు సంక్షేమ ఫలాలు అందించడంతోపాటు అనర్హులు పొందిన ప్రయోజనాలను రికవరీ చేసే విషయమై ప్రభుత్వం త్వరలో స్పష్టమైన మార్గదర్శకాలను జారీ చేస్తుందని పేర్కొన్నారు. వృద్ధులకు అండగా ఉండేందుకు గత కేసీఆర్ ప్రభుత్వం అత్యంత మానవీయ కోణంలో ఆసరా పథకాన్ని అమలు చేయగా, ప్రస్తుత కాంగ్రెస్ ప్రభుత్వం అనర్హుల పేరుతో అప్పుడిచ్చిన పెన్షన్ మొత్తాలను రికవరీ చేసేందుకు సిద్ధపడటం వివాదస్పదమైంది.
పెన్షన్లను రూ.2,000 నుంచి రూ.4,000కు పెంచుతామని ఎన్నికల ప్రచారంలో చెప్పిన కాంగ్రెస్ పార్టీ, ఇప్పుడు ఉన్న పింఛన్లనే ఊడబీకే పని పెట్టుకున్నది. రాష్ట్రవ్యాప్తంగా 1,826 మంది అనర్హులు ఉన్నారంటూ ఒక జాబితాను రూపొందించిన సర్కారు, వారినుంచి పెన్షన్లను రికవరీ చేయాలని అధికారులను ఆదేశించింది. ఈ క్రమంలోనే భదాద్రి కొత్తగూడెంలోని బాబాక్యాంపునకు చెందిన దాసరి మల్లమ్మకు జారీచేసిన నోటీసులు సామాజిక మాధ్యమాల్లో వైరల్ కావడంతో ప్రభుత్వంపై పెద్ద ఎత్తున విమర్శలొచ్చాయి. వృద్ధాప్యంతోపాటు పక్షవాతంతో మంచానికే పరిమితమైన మల్లమ్మకు రికవరీ నోటీసులు జారీచేయడంతో బీఆర్ఎస్ వర్కింగ్ ప్రెసిడెంట్ కేటీఆర్ స్పందించారు.
దీంతో అధికార యంత్రాంగం హుటాహుటిన మల్లమ్మ ఇంటికి చేరుకొని ఆమె ఆర్థిక, కుటుంబ పరిస్థితులపై ప్రభుత్వానికి నివేదిక సమర్పించింది. ఉద్యోగం చేస్తున్న కూతురు మరణించడంతో మల్లమ్మకు ఫ్యామిలీ పెన్షన్ వస్తున్న విషయాన్ని అధికారులు గుర్తించారు. ఆమె పోషణ, వైద్య ఖర్చులకే భారీగా ఖర్చవుతుండటంతో ఆమె నుంచి రికవరీ చేయడం సాధ్యంకాదని అధికారులు గుర్తించారు. వృద్ధులకు సహజంగానే అనారోగ్య సమస్యలుంటాయి. వారిని సరిగా చూసుకునేవారు ఉండరనే ఉద్దేశంతోనే గత కేసీఆర్ సర్కారు ఆసరా పెన్షన్ల జారీలో కొంత ఉదారంగా వ్యవహరించింది. కాగా, ప్రస్తుత కాంగ్రెస్ ప్రభుత్వం వారి ఆరోగ్య, కుటుంబ పరిస్థితులు పట్టించుకోకుండా రికవరీ నోటీసులు జారీచేయడం వివాదాస్పదమైంది. ప్రజల నుంచి విమర్శలు వెల్లువెత్తడంతో ప్రభుత్వం పునరాలోచనలో పడింది.