యాదగిరిగుట్ట, జూన్ 18 : రాష్ర్టానికి బీఆర్ఎస్ నాయకత్వం ఎంతో అవసరమని, ఆ పార్టీ ఎప్పటికీ ఉండాలని కొత్తగూడెం ఎమ్మెల్యే, సీపీఐ రాష్ట్ర కార్యదర్శి కూనంనేని సాంబశివరావు సూచించారు. ఆ దిశగా మాజీ సీఎం కేసీఆర్ కృషి చేయాలని కోరారు. మంగళవారం యాదగిరిగుట్ట పట్టణంలో దళిత హక్కుల పోరాట సమితి ఆధ్వర్యంలో మూడు రోజులపాటు నిర్వహించే రాష్ట్ర స్థాయి రాజకీయ శిక్షణ తరగతులను ఆయన ప్రారంభించారు. ఈ సందర్భంగా కూనంనేని మాట్లాడుతూ.. బీఆర్ఎస్ను చంపి బీజేపీని బతికిస్తే మంచిది కాదని అన్నారు. ఐటీ చెల్లించే వారికి కూడా రుణమాఫీ చేయాలని ప్రభుత్వాన్ని కోరారు. తాము ప్రభుత్వంలో భాగమైనా ఉద్యమాలు, పోరాటాలు ఆపే ప్రసక్తే లేదని స్పష్టం చేశారు. తెలంగాణలో బీజేపీ 8 ఎంపీ సీట్లు గెలువడం దురదృష్టకరమని తెలిపారు. బీజేపీ, కాంగ్రెస్ పార్టీలు సిద్ధాంతాలను మరిచాయని, ఇతర పార్టీల నాయకులను చేర్చుకొని అధికారంలోకి వచ్చాయని విమర్శించారు. బీజేపీ ఎంపీలు కొండా విశ్వేశ్వర్రెడ్డి, డీకే అరుణ, ఈటల రాజేందర్కు కమలం పార్టీతో సంబంధం లేదని, ఆ పార్టీలో ఎంపీ కిషన్రెడ్డి మినహా ఎవ్వరూ బీజేపీకి చెందిన వారు కాదని చెప్పారు. టీడీపీ నుంచి రేవంత్రెడ్డి కాంగ్రెస్లోకి వచ్చారని, ఆయనతోపాటు చాలామంది కాంగ్రెస్ ఎమ్మెల్యేలు ఇతర పార్టీల నుంచి వచ్చిన వారేనని గుర్తుచేశారు. బీజేపీ, కాంగ్రెస్ మాదిరిగా అధికార దాహంతో సీపీఐ ఉండబోదని అన్నారు.