హైదరాబాద్, జూన్ 26 (నమస్తే తెలంగాణ): హుజూరాబాద్ నియోజకవర్గంలో లబ్ధిదారులకు కల్యాణలక్ష్మి, షాదీ ముబారక్ చెకులను పంపిణీ చేస్తామని రాష్ట్ర ప్రభుత్వం బుధవారం హైకోర్టుకు తెలిపింది. పిటిషనర్, బీఆర్ఎస్ ఎమ్మెల్యే పాడి కౌశిక్రెడ్డి చెప్తున్నట్టు ఈ నెల 27 తర్వాత చెకులు చెల్లకుండాపోయే అవకాశం లేదని తెలిపింది. ఆగస్ట్ నెల వరకు చెకులు చెల్లుబాటులో ఉంటాయని పేర్కొంది. ఇప్పటికే 71మంది లబ్ధిదారుల చెకులు బ్యాంకులకు పంపించామని అదనపు అడ్వకేట్ జనరల్ ఇమ్రాన్ఖాన్ చెప్పారు.
ప్రభుత్వ జీవో ప్రకారం అర్హులైన అందరికీ చెకులను అందజేస్తామని తెలిపారు. ప్రభుత్వ హామీని రికార్డుల్లో నమోదు చేసుకున్న హైకోర్టు పూర్తి వివరాలతో కౌంటర్ అఫిడవిట్ దాఖలు చేయాలని ఆదేశించింది. విచారణను జూలై 15కు వాయి దా వేస్తున్నట్టు జస్టిస్ సూరేపల్లి నందా పేర్కొన్నారు. హుజురాబాద్లోని లబ్ధిదారులకు కల్యాణలక్ష్మి, షాదీముబారక్ చెకులు పంపిణీ చేయకుండా నియోజకవర్గ ఎమ్మెల్యేగా ఉన్న తనను అడ్డుకుంటున్నారంటూ కౌశిక్రెడ్డి హైకోర్టులో వ్యాజ్యాన్ని దాఖలు చేశారు. మంత్రి పొన్నం ప్రభాకర్ ఒత్తిళ్ల కారణంగా అధికారులు తనను అడ్డుకున్నారని, చెకుల పంపిణీ కార్యక్రమంలో పాల్గొననీయడం లేదని తెలిపారు. లబ్ధిదారులకు రాజకీయాలతో సంబంధం లేకుండా వెంటనే చెకుల పంపిణీకి ఉత్తర్వులు ఇవ్వాలని కోరారు.