కోస్గి, మే 26 : రైతుల ఆందోళనతో దిగివచ్చిన సర్కార్ ధాన్యం కొనుగోళ్లకు ముందుకొచ్చింది. మూడు రోజులుగా రైస్మిల్లు చుట్టూ తిరిగినా ధాన్యం కొనుగోలు చేయకపోవడంతో విసుగుచెందిన రైతులు శనివారం నారాయణపేట జిల్లా కోస్గి మండల కేంద్రంలోని కడంపల్లి గేటు సమీపంలో కోస్గి-మద్దూర్ రహదారిపై రైతులు ధర్నా కు దిగారు. మూడు, నాలుగు రోజుల నుంచి ధనలక్ష్మి రైస్మిల్ చుట్టూ తిరుగుతున్నా.. టోకెన్లు ఇచ్చి చేతులు దులుపుకొన్నారని పలువురు రైతులు ధ్వజమెత్తారు. దాదాపు 30 నుంచి 40 వరకు ట్రాక్టర్లు, ఆటోలు ఇతర వాహనాల్లో గ్రామాల నుంచి రైతులు ధాన్యం విక్రయించేందుకు తీసుకొచ్చినా కొనుగోలు చేయక పడిగాపులు కాయాల్సి వస్తుందని, తినేందుకు తిండి, తాగేందుకు నీళ్లు లేక గోసపడుతున్నామని ఆవేదన వ్యక్తంచేశారు. రైతుల ఆందోళనను ‘నమస్తే తెలంగాణ’లో ఆదివారం ‘ధాన్యం కొనక వాత’ అనే శీర్షికన కథనం ప్రచురితమైంది. దీం తో ఎట్టకేలకు రైస్మిల్లు యజమానులు దిగివచ్చారు. ఆదివారం ఉదయం నుంచే రైతుల వడ్లను కొనుగోలును మొదలుపెట్టారు. కాగా రైతులకు అల్పాహారంగా ఉగ్గాని, మధ్యాహ్నం అన్నం, చికెన్ కర్రీ వడ్డించారు. పలుమార్లు స్వయంగా కొడంగల్ మాజీ ఎమ్మెల్యే పట్నం నరేందర్రెడ్డి అన్నం వడ్డించారు.