హైదరాబాద్, జూలై 21 (నమస్తే తెలంగాణ): రాష్ట్రంలో పంచాయతీ కార్మికుల సమస్యలను పరిష్కరించి, సమ్మెను విరమింపచేయాలని సీపీఎం మాజీ ఎమ్మెల్యే జూలకంటి రంగారెడ్డి ప్రభుత్వాన్ని విజ్ఞప్తి చేశారు. శుక్రవారం పంచాయతీరాజ్, గ్రామీణాభివృద్ధిశాఖ మంత్రి ఎర్రబెల్లి దయాకర్రావును కలిసి 8 డిమాండ్లతో కూడిన వినతిపత్రాన్ని అందజేశారు. రాష్ట్రంలోని 12,769 గ్రామ పంచాయతీల్లో పనిచేస్తున్న 50 వేల మందికి పైగా పంచాయతీ కార్మికులు అనేక ఇబ్బందులు ఎదుర్కొంటున్నారని తెలిపారు. కార్మికుల కోసం ప్రత్యేక బడ్జెట్ కేటాయించి, ప్రతినెలా సరైన వేతనాలు ఇవ్వాలని కోరారు. కార్యక్రమంలో సీఐటీయూ నేత పాలడుగు భాస్కర్ తదితరులు పాల్గొన్నారు.