Medical Colleges | హైదరాబాద్, జూలై 8 (నమస్తే తెలంగాణ): రాష్ట్రంలో కొత్తగా ఏర్పాటుచేస్తున్న 8 మెడికల్ కాలేజీలకు అనుమతులు రావటంపై సందేహాలు నెలకొన్నాయి. సిబ్బందిని నియమించటంలో ప్రభుత్వం తీవ్ర నిర్లక్ష్యం ప్రదర్శిస్తుండటంతో కాలేజీలకు ఇప్పటివరకు నేషనల్ మెడికల్ కమిషన్ (ఎన్ఎంసీ) నుంచి అనుమతులు రాలేదు. జోగులాంబ గద్వాల, నారాయణపేట, ములుగు, మెదక్, యాదాద్రి భువనగిరి, వరంగల్, రంగారెడ్డి, మేడ్చల్ మల్కాజిగిరి జిల్లాల్లో ఏర్పాటయ్యే కాలేజీల కోసం ఒక్కో కాలేజీలో 50 సీట్లు కేటాయించాలని దరఖాస్తు చేసుకున్నది. నిబంధనల ప్రకారం వసతులు ఉన్నాయో లేదో మెడికల్ అసెస్మెంట్ అండ్ రేటింగ్ బోర్డు పరిశీలించి లెటర్ ఆఫ్ పర్మిషన్ ఇస్తుంది.
నిబంధనల ప్రకారం 50 ఎంబీబీఎస్ సీట్లతో కాలేజీ ఏర్పాటు చేయాలంటే 14 మంది ప్రొఫెసర్లు, 20 మంది అసోసియేట్ ప్రొఫెసర్లు, 25 మంది అసిస్టెంట్ ప్రొఫెసర్లు ఉండాలి. మొత్తంగా 59 మంది బోధన సిబ్బంది తప్పనిసరిగా ఉండాలి. అయితే సిబ్బందిని నియమించటంలో వైద్యారోగ్య శాఖ తీవ్ర నిర్లక్ష్యం ప్రదర్శిస్తున్నది. 8 కొత్త కాలేజీల్లో ప్రిన్సిపాళ్లు, దవాఖాన సూపరింటెండెంట్లు తప్ప మిగతా సిబ్బంది నియామకం జరగలేదు. ఇటీవల ఎన్ఎంసీ బృందం తనిఖీలకు వచ్చింది. ఈ సందర్భంగా బోధన సిబ్బంది ఒక్కరు కూడా లేకపోవటంపై ఆశ్చర్యం వ్యక్తం చేసినట్టు చెప్పుకుంటున్నారు. ఈ విషయంపై ఎంఏఆర్బీ తీవ్ర అసంతృప్తి వ్యక్తం చేసినట్టు తెలిసింది.
కాలేజీల్లో ఉన్న లోపాలను ఎత్తిచూపుతూ ఆయా కాలేజీల ప్రిన్సిపాళ్లకు మెయిల్ ద్వారా సమాచారం అందించింది. సిబ్బంది నియామకంపైనే ప్రధానంగా అసంతృప్తి వ్యక్తం చేసినట్టు తెలిసింది. నిబంధనల మేరకు ఎన్ఎంసీ లేవనెత్తిన లోపాలను వైద్యారోగ్యశాఖ 60 రోజుల్లోగా సవరించుకోవాలి. లేకపోతే అనుమతులు ఇవ్వరు. అయితే ఆలోగా కొత్త మెడికల్ కాలేజీలకు సంబంధించి నియామక ప్రక్రియ పూర్తికావటంపై అనుమానాలు ఉన్నాయి.
ఇటీవల అసోసియేట్ ప్రొఫెసర్లుగా పదోన్నతులు పొందినవారిని కేటాయించినా.. ప్రొఫెసర్లు, అసిస్టెంట్ ప్రొఫెసర్లు, సీనియర్ రెసిడెంట్ల నియమాక ప్రక్రియ ఎప్పుడు ప్రారంభం అవుతుందో, ఎపుడు ముగుస్తుందో తెలియని పరిస్థితి. ప్రభుత్వం ఏర్పడినప్పటి నుంచే కొత్త మెడికల్ కాలేజీలకు అనుమతులపై శ్రద్ధ పెట్టి ఉంటే ఈ పరిస్థితి వచ్చేది కాదని నిపుణులు చెప్తున్నారు. ఆయా కాలేజీల ప్రిన్సిపాళ్లు మొదటి నుంచీ వైద్యారోగ్యశాఖకు పదే పదే గుర్తు చేస్తున్నా పట్టించుకోలేదని చెప్పుకుంటున్నారు. ఇప్పటికైనా వేగంగా స్పందిస్తుందో లేదో చూడాలని పేర్కొంటున్నారు.