హైదరాబాద్, జూన్ 19(నమస్తే తెలంగాణ): 2024-25 ఆర్థిక సంవత్సరానికిగాను వ్యవసాయరంగానికి రూ.1.34 లక్షల కోట్లతో రాష్ట్రస్థాయి బ్యాంకర్ల కమిటీ(ఎస్ఎల్బీసీ) రుణ ప్రణాళికను ఖరారు చేసింది. ఇందులో రూ.81వేల కోట్లను క్రాప్లోన్ కింద రైతులకు అందించనున్నది. బుధవారం నిర్వహించిన సమావేశంలో వార్షిక రుణ ప్రణాళికను డిప్యూటీ సీఎం భట్టి విక్రమార్క, వ్యవసాయ శాఖ మంత్రి తుమ్మల నాగేశ్వరరావు విడుదల చేశారు.
మొత్తం రూ. 2.80 లక్షల కోట్లతో ఎస్ఎల్బీసీ వార్షిక రుణ ప్రణాళికను రూపొందించింది. ఇందులో వ్యవసాయరంగానికి 1.34 లక్షల కోట్లు కేటాయించింది. గతంకన్నా 18.95శాతం రుణస్థాయిని పెంచింది. ఇందులో స్వల్పకాలిక(క్రాప్లోన్) రుణం కోసం రూ. 81,478కోట్లు కేటాయించింది. ఇది గతేడాదితో పోల్చితే 10.95శాతం అధికం. ఎంఎస్ఎంఈలకు రూ.1.29 లక్షల కోట్లతో రుణ ప్రణాళికను రూపొందించింది. హౌసింగ్ సెక్టార్కు రూ.10,768 కోట్లు, విద్యకు రూ. 2,706 కోట్లు, ఇతర రంగాలకు రూ. 3,301 కోట్ల రుణ ప్రణాళికను ఖరారు చేసింది.