Sircilla | కరీంనగర్, జూలై 24 (నమస్తే తెలంగాణ ప్రతినిధి) : చేనేత రంగ సంక్షోభ నివారణకు కాంగ్రెస్ సర్కార్ దృష్టిసారించకపోవడాన్ని నిరసిస్తూ గురువారం సిరిసిల్ల బంద్కు పవర్లూం వస్త్ర పరిశ్రమ అనుబంధ సంస్థల ఐక్యవేదిక (జేఎసీ) పిలుపునిచ్చింది. 3 రోజులుగా సిరిసిల్ల పట్టణంలోని అంబేద్కర్ చౌరస్తాలో రిలే నిరాహారదీక్షలు చేపడుతున్నారు. జేఏసీ పోరాటానికి బీఆర్ఎస్, బీజేపీ, సీపీఐ, సీఐటీయూ వంటి సంఘాలు మద్దతు ప్రకటించాయి.
పవర్లూం పరిశ్రమకు 10 హెచ్పీ వరకు ఉచిత విద్యుత్తు అందించాలని, ఆపైన 4వ క్యాటగిరీ కింద పరిగణిం చి 50 శాతం సబ్సిడీ ఇవ్వాలని, బతుకమ్మ చీరలు లేదా జనతా వస్ర్తాల పథకాలు, స్కూల్ డ్రెస్ల ఆర్డర్లు ఇచ్చి కార్మికులకు ఉపాధి కల్పించాలని వస్త్ర పరిశ్రమ అనుబంధ సంస్థల ఐక్యవేదిక ప్రభుత్వాన్ని డిమాండ్ చేసింది. సిరిసిల్లలో యార్న్ డిపో ఏర్పాటు చేయాలని, వర్క ర్ టు ఓనర్ పథకాన్ని పూర్తిచేసి కార్మికులకు అందించాలని, 10 శాతం యార్న్ సబ్సిడీ, త్రిఫ్ట్ ఫండ్, నేతన్న బీమా అమలు చేసి కార్మికులకు పీఎఫ్, ఈఎస్ఐ సౌకర్యం కల్పించాల ని కోరుతున్నది. వస్త్ర పరిశ్రమను శాశ్వతంగా సంక్షోభం నుంచి బయట పడేసేందుకు చర్య లు తీసుకోవాలని పేర్కొంది. ఈ డిమాండ్లను ఇప్పటికే రాష్ట్ర ప్రభుత్వం ముందు పెట్టినా స్పందన లేకపోవడంతో రిలే దీక్షలకు పూనుకున్నది. మూడు రోజులుగా దీక్షలు చేస్తున్నా స్పందన లేకపోవడంతో.. గురువారం సిరిసిల్ల బంద్కు పిలుపునిచ్చింది. అయినా ప్రభుత్వం దిగి రాకపోతే.. ఈ నెల 27 అసెంబ్లీని ముట్టడిస్తామని జేఏసీ ప్రకటించింది.
అసెంబ్లీని ముట్టడిస్తాం
రాష్ట్ర ప్రభుత్వ ఏకపక్ష నిర్ణయాలతోనే వస్త్ర పరిశ్రమ సంక్షోభం నెలకొన్నది. తక్షణమే 15 కోట్ల మీటర్ల వస్త్ర ఆర్డర్లు ఇచ్చి నేతన్నలకు ఊపాధి కల్పించాలి. పది హెచ్పీలకు వరకు మరమగ్గాలకు ఉచిత విద్యుత్తు అందించాలి.. నాలుగో క్యాటగిరీలో చేర్చి సబ్సిడీ కొనసాగించాలి. వస్త్ర పరిశ్రమకు రావాల్సిన రూ.180 కోట్లు వెంటనే విడుదల చేయాలి. 2023 వరకు పెడింగ్లో ఉన్న యార్న్ సబ్సిడీ విడుదల చేయాలి. వర్క్ టు ఓనర్ పథకాన్ని పూర్తిచేసి కార్మికులకు అందించాలి. గురువారం నాటి బంద్కు వ్యాపార, వాణిజ్య వర్గాల ప్రజలు సహకరించి విజయవంతం చేయాలి. ప్రభుత్వంలో చలనం రాకపోతే ఈనెల 27 వేలాది మంది కార్మికులతో అసెంబ్లీని ముట్టడిస్తాం.
– మూషం రమేశ్, తెలంగాణ పవర్లూమ్స్ వర్కర్స్ అసోసియేషన్ రాష్ట్ర అధ్యక్షుడు