వేములవాడ, జూన్ 18: ఆపిల్ వాచ్ చేసిన అలర్ట్తో ముందస్తు గుండెపోటు ప్రమాదం నుంచి తప్పించుకున్నారు రాజన్న సిరిసిల్ల జిల్లా బీజేపీ అధ్యక్షుడు ప్రతాప రామకృష్ణ. కొద్దిరోజులుగా ఆయన ఆపిల్ వాచ్ వాడుతున్నారు. ఇటీవల కాలంలో కొంతదూరం నడిస్తే ఆయాసం, ఛాతిలో మంటలా ఉన్నప్పటికీ పెద్దగా పట్టించుకోలేదు. గుండెకు సంబంధించిన ఇబ్బంది ఉన్నదని, తక్షణమే వైద్యుల సలహా తీసుకోవాలని ఆపిల్ వాచ్ సోమవారం అలర్ట్ చేసింది.
అప్రమత్తమైన ఆయన వరంగల్ వైద్యులను సంప్రదించారు. పరీక్షించిన డాక్టర్లు గుండెకు సంబంధించిన రెండు రక్తనాళాలు మూసుకుపోయాయని, మెరుగైన వైద్యం కోసం హైదరాబాద్ వెళ్లాలని సూచించారు. మంగళవారం ఆయన హైదరాబాద్లోని యశోద దవాఖానకు వెళ్లి వైద్య సేవలు పొందారు. విషయం తెలుసుకున్న కేంద్ర మంత్రులు కిషన్రెడ్డి, బండి సంజయ్, మహారాష్ట్ర మాజీ గవర్నర్ చెన్నమనేని విద్యాసాగర్రావు ఆయన ఆరోగ్య పరిస్థితిని అడిగి తెలుసుకున్నట్టు సమాచారం.