హైదరాబాద్, జూన్ 17 (నమస్తే తెలంగాణ): ఉద్యోగుల సమాచారం, సేవలకు ఇన్ఫర్మేషన్ టెక్నాలజీ (ఐటీ)ని విస్తృతంగా వాడుతున్నందుకు సింగరేణి సంస్థ ఐటీ విభాగానికి జాతీయ అవార్డు దక్కింది. అత్యుత్తమ ఐటీ సేవలకుగాను కంప్యూటర్ ఎక్స్ప్రెస్ సంస్థ అందజేసే అవార్డును ఆదివారం రాత్రి రాజస్థాన్లోని జైపూర్లో జరిగిన జాతీయ స్థాయి సమావేశంలో ఎంటర్ప్రైజ్ అప్లికేషన్ కేటగిరిలో సింగరేణికి ప్రదానం చేశారు. సోమవారం ఉదయం సింగరేణి భవన్లో కో-ఆర్డినేషన్ జీఎం జీ దేవేందర్, ఐటీ ప్రాజెక్ట్ మేనేజర్ హరప్రసాద్, ఐటీ డిప్యూటీ మేనేజర్లు హరిశంకర్, హరిప్రసాద్, మేనేజర్ రామ లక్ష్మయ్యలు ఈ పురస్కారాన్ని సింగరేణి సంస్థ సీఎండీ బలరాంకు అందజేశారు. అవార్డు లభించడంపట్ల ఆయన ఉద్యోగులను అభినందించారు.