చేర్యాల, జూన్ 10 : సిద్దిపేట జిల్లా చేర్యాల మండలంలోని ఓ గ్రామంలో మూగ యువతిపై అదే గ్రామానికి చెందిన వ్యక్తి లైంగిక వేధింపులకు పాల్పడ్డాడు. పోలీసులు తెలిపిన వివరాల ప్రకారం.. ఆ యువతి తల్లిదండ్రులు వేర్వేరుగా ఉంటుండటంతో ఆమె అమ్మమ్మ ఇంటి వద్ద ఉంటుంది. గ్రామానికి చెందిన ఓ వ్యక్తి ఆమెపై కన్నేసి ఆదివారం రాత్రి లైంగికంగా వేధించాడు.
విషయం బయటకు పొక్కడంతో పలువురు పెద్ద మనుషులు సోమవారం పంచాయితీ నిర్వహించి బాధితురాలికి రూ.90 వేలు ఇవ్వాలని నిందితుడిని ఆదేశించారు. ఇదే సమయంలో గ్రామానికి పోలీసులు వచ్చారనే విషయం తెలియడంతో పెద్ద మనుషులు అక్కడి నుంచి జారుకున్నారు. లైంగిక వేధింపులకు సంబంధించి బాధితురాలి బంధువులు, స్థానికులతో ఆరా తీశారు. అనంతరం బాధితురాలి బంధువులు ఫిర్యాదు మేరకు నిందితుడిపై లైంగిక వేధింపుల కేసు నమోదు చేసినట్టు పోలీసులు తెలిపారు.