హైదరాబాద్, జూన్ 25 (నమస్తే తెలంగాణ): ‘ప్రభుత్వ జూనియర్, డిగ్రీ కాలేజీల్లో పనిచేస్తున్న గెస్ట్ ఫ్యాకల్టీలకు నెలకు రూ.42 వేలు, యూనివర్సిటీల్లో పనిచేస్తున్న పార్ట్టైమ్ లెక్చరర్లకు రూ.50 వేల గౌరవ వేతనాన్ని సవరించి అందజేస్తాం. ఏటా ఆటో రెన్యువల్ చేస్తాం’ ఇది కాంగ్రెస్ ప్రకటించిన అభయహస్తం మ్యానిఫెస్టోలో గెస్ట్ లెక్చరర్లకు ఇచ్చిన హామీ. కానీ అధికారంలోకి వచ్చి 6 మాసాలు గడిచినా ఆ హామీని విస్మరించి గెస్ట్ లెక్చరర్లను కాంగ్రెస్ సర్కారు మోసం చేసింది. ఇంటర్ విద్యలో గతంలో పనిచేసిన 1,654 మంది గెస్ట్ ఫ్యాకల్టీపై వేటు వేయబోతున్నది. ఒకే ఒక్క కలం పోటుతో గెస్ట్ ఫ్యాకల్టీ విధానాన్నే తొలగించి ఔట్ సోర్సింగ్ విధానంలోకి మార్చనున్నది.
ఇందుకు సంబంధించిన ప్రతిపాదనలు ఇంటర్ విద్య కమిషరేట్ నుంచి ప్రభుత్వానికి చేరాయి. విద్యాశాఖ ముఖ్య కార్యదర్శి బుర్రా వెంకటేశం పరిశీలనలో ఈ ప్రతిపాదనలు ఉన్నాయి. ఇందుకు ప్రభుత్వం ఆమోదం తెలిపితే, ఔట్ సోర్సింగ్ ఏజెన్సీల రాజ్యం ఇంటర్ విద్యలో ప్రవేశించనున్నది. ఒక నియామకానికో పర్సంటేజీ, ఉద్యోగానికో రేటు చొప్పున అడ్డగోలుగా ఉద్యోగాలను అమ్ముకునే రోజులు మళ్లీ రానున్నాయి. ప్రస్తుతం పాతవారిని కొనసాగించకుండా, ఔట్సోర్సింగ్ విధానంలో గెస్ట్ లెక్చరర్లను తీసుకోవాలన్న ప్రతిపాదనలను గెస్ట్ లెక్చరర్ల సంఘాల నేతలు తీవ్రంగా వ్యతిరేకిస్తున్నారు. దీనిని ప్రభుత్వం విరమించుకోవాలని ఆయన డిమాండ్ చేశారు. ఉద్యోగ భద్రత లేకుండా, చాలీచాలని పారితోషికంతో కాలం వెళ్లదీస్తున్న తమను రోడ్డునపడేయడం సరికాదని గెస్ట్ లెక్చరర్ల సంఘం నేత భాస్కర్ ఆవేదన వ్యక్తంచేశారు.
డిగ్రీ గెస్ట్ లెక్చరర్ల ఆందోళన
ప్రభుత్వ డిగ్రీ కాలేజీ గెస్ట్ లెక్చరర్లు మంగళశారం ఆందోళన బాటపట్టారు. తమను ఆటో రెన్యువల్ చేయాలని, పారితోషికాన్ని పెంచాలని డిమాండ్ చేస్తూ మంగళవారం హైదరాబాద్ నాంపల్లిలోని కాలేజీయేట్ కమిషనరేట్ కార్యాలయం ఎదుట ధర్నా నిర్వహించారు. ఈ సందర్భంగా గెస్ట్ లెక్చరర్ల సంఘం నేతలు మాట్లాడుతూ ప్రభుత్వ డిగ్రీ కాలేజీల్లో 1,342 మంది లెక్చరర్లుగా పనిచేస్తున్నామని, తమను ఆటో రెన్యువల్ చేయాలని కోరారు.
ఒక్కో సెమిస్టర్కు 90 రోజులు పూర్తికాగానే తమను తొలగిస్తున్నారని, ఆ తర్వాత మళ్లీ నెల, రెండు నెలలకు మళ్లీ కొనసాగిస్తున్నారని, దీంతో తాము నష్టపోతున్నామని తెలిపారు. ఇంటర్వ్యూల నిబంధనను తొలగిస్తామని కాంగ్రెస్ హామీ ఇచ్చి నేడు విస్మరించిందని ధ్వజమెత్తారు. తమకు నెలకు ఇస్తున్న రూ.28 వేల పారితోషికాన్ని రూ.42 వేలకు పెంచుతామన్న కాంగ్రెస్ హామీని నెరవేర్చలేదని ఆవేదన వ్యక్తం చేశారు. ఈ ఆందోళనలో డిగ్రీ కాలేజీ గెస్ట్ లెక్చరర్ల అసొసియేషన్ అధ్యక్షుడు కొర్ర ఈశ్వర్లాల్ నాయక్, బగ్గునాయక్ తదితరులు పాల్గొన్నారు.