రాజోళి, జూన్ 21 : తుంగభద్ర నది నుంచి ఇసుక తరలిస్తున్న జోగుళాంబ గద్వాల జిల్లాకు చెందిన ఇసుక ట్రాక్టర్ల వివాదం మరోసారి తెరపైకి వచ్చింది. తెలంగాణ ప్రభుత్వం నుంచి వచ్చిన అనుమతుల ఆధారంగా తూర్పు గార్లపాడు శివారులో ఇసుక రీచ్ను ఏర్పాటు చేశారు. ఇక్కడి నుంచి జిల్లా వ్యాప్తంగా అనుమతి పొందిన వినియోగదారులకు సరఫరా చేస్తున్నారు. శుక్రవారం ఏపీ పోలీసులు, రెవెన్యూ అధికారులు గ్రామానికి వచ్చి ఇసుక ట్రాక్టర్లను అడ్డుకున్నారు. ఈ విషయాన్ని ట్రాక్టర్ల డ్రైవర్లు, యజమానులు రాజోళి పోలీసులకు సమాచారం ఇచ్చారు. శాంతినగర్ సీఐ సిబ్బందితో చేరుకున్నారు. గద్వాల జిల్లా అధికారులు ఏపీ ఆఫీసర్లతో మాట్లాడి సమస్యను కొలిక్కి తీసుకొచ్చారు. దీంతో నదిలో ఇసుక కోసం వచ్చిన 64 ట్రాక్టర్లకు రూ.5 వేల చొప్పున జరిమానా విధించినట్లు సమాచారం.