Runa Mafi | హైదరాబాద్, జూలై 21(నమస్తే తెలంగాణ): రుణమాఫీ అర్హుల జాబితాలో కాంగ్రెస్ ప్రభుత్వం అడ్డగోలుగా కోతలు పెడుతున్నది. రేషన్కార్డు లేని కుటుంబాలకు, ప్రభుత్వ ఉద్యోగుల కుటుంబాలకు, పెన్షన్దారులకు, ఆదాయపు పన్ను చెల్లించే వారికి రుణాన్ని మాఫీ చేయడం లేదు. రూ. లక్ష వరకు రుణమాఫీ చేసిన ప్రభుత్వం అందులో వీరికి మొండి చెయ్యి చూపించింది. తమ రుణం మాఫీ అయిందేమోనని ఆశగా బ్యాంకుకు వెళ్లిన వీరికి జాబితాలో వారి పేరు లేకపోవడంతో నిరాశే ఎదురవుతున్నది. తమకు రుణమాఫీ కాకపోవడానికి గల కారణాలను తెలుసుకునేందుకు ఏఈవోల వద్దకు క్యూ కడుతున్నారు. రుణమాఫీ వెబ్సైట్లో ఫిర్యాదుదారుల ఆధార్కార్డు నంబర్ ఎంట్రీ చేస్తే కొందరికేమో ‘రేషన్కార్డు లేదని’, మరికొందరికేమో ‘కుటుంబంలో ప్రభుత్వ ఉద్యోగి ఉన్నారు’ అని చూపిస్తున్నది. అందుకనే వారికి రుణమాఫీ వర్తించడం లేదని చెప్తున్నారు. దీంతోపాటు ఆదాయపన్ను చెల్లిస్తున్న వారికి కూడా తొలి జాబితాలో అర్హత ఉన్నా రుణం మాఫీ కాలేదని తెలిసింది. కోతల్లో భాగంగా వీళ్లకు కూడా ప్రభుత్వం మొండి చెయ్యి చూపిందనే విమర్శలు వినిపిస్తున్నాయి. దీనినిబట్టి రుణమాఫీలో కోతలు ఉండబోవని ప్రభుత్వం చేస్తున్న ప్రకటనలు ఉత్తవేనని స్పష్టమైంది.
రేషన్కార్డు ప్రామాణికంగా కుటుంబాన్ని గుర్తిస్తామని, పీఎం కిసాన్ నిబంధనల్లో అమలుకు అవకాశం ఉన్నంత వరకు పరిగణలోకి తీసుకుంటామని ప్రభుత్వం రుణమాఫీ నిబంధనల్లో పేర్కొన్నది. ఈ నిబంధన వల్ల పెద్ద సంఖ్యలో రైతులు రుణమాఫీకి అనర్హులవుతారన్న విమర్శలు వచ్చాయి. దీంతో నష్టనివారణ చర్యల్లో భాగంగా రుణమాఫీకి రేషన్కార్డు ప్రామాణికం కాదని, పట్టాదార్ పాస్ పుస్తకం ఉన్న ప్రతి రైతుకు రుణమాఫీ చేస్తామని సీఎం రేవంత్రెడ్డి గొప్పగా చెప్పారు. తీరా అమలులో మాత్రం ప్రభుత్వం అన్నంత పనీ చేసింది. పీఎం కిసాన్ నిబంధనలను అన్నింటిని రుణమాఫీలో అమలు చేస్తున్నది. అందుకే రేషన్కార్డు లేని వారికి, ప్రభుత్వ ఉద్యోగులకు, ఆదాయపు పన్ను చెల్లించేవారికి, రాజ్యాంగబద్ధమైన పదవుల్లో ఉన్నవారికి రుణమాఫీ కావడం లేదు. ఒక విధంగా చెప్పాలంటే పీఎం కిసాన్ పెట్టుబడి సాయం అందుతున్న వారికి మాత్రమే రుణమాఫీ అవుతున్నది. పీఎం కిసాన్ అందుతున్న వారిలోనూ ప్రభుత్వం కోతలు పెట్టడం గమనార్హం. రేషన్కార్డును కచ్చితం చేయడంతో పీఎం కిసాన్ సాయం అందుతున్నప్పటికీ రేషన్కార్డు లేకపోతే వాళ్లకు కూడా రుణమాఫీ కావడం లేదు. పీఎం కిసాన్ లబ్ధిదారుల సంఖ్యకు కాస్త అటు ఇటుగా రుణమాఫీ లబ్ధిదారుల సంఖ్యను ప్రభుత్వం గుర్తించడం అనుమానాలను పటాపంచలు చేస్తున్నది. రాష్ట్రంలో పీఎం కిసాన్ పెట్టుబడి సాయం సుమారు 33 లక్షల మంది రైతులకు అందుతున్నది. ఇప్పుడు రుణమాఫీకి కూడా ప్రభుత్వం సుమారు 32.5 లక్షల మంది రైతులను మాత్రమే అర్హులుగా తేల్చింది.
రుణమాఫీలో కేవలం ప్రభుత్వ ఉద్యోగులకే కాదు, వారి కుటుంబం మొత్తానికి కోత పెడుతున్నట్టు తెలిసింది. ఆధార్ నంబర్ ఆధారంగా కుటుంబ సభ్యులను గ్రూపింగ్ చేసి వారిలో ఒక్కరు ప్రభుత్వ ఉద్యోగి ఉన్నా మొత్తం కుటుంబ సభ్యులకు రుణమాఫీ చేయడం లేదని తెలిసింది. వారు వేర్వేరుగా ఉంటున్నప్పటికీ అందరినీ రుణమాఫీకి దూరం చేస్తున్నారు. ఒకవేళ తీసేయాల్సి వస్తే ఉద్యోగిని మినహాయించాలి గానీ కుటుంబం మొత్తాన్ని మినహాయించడం ఏమిటని ప్రశ్నిస్తున్నారు. ప్రభుత్వ నిబంధనలతో భారీ సంఖ్యలో రైతులు రుణమాఫీకి నోచుకోవడం లేదు. రూ. లక్ష రుణమాఫీకే ఇలా ఉంటే ఆ పైన రుణాల మాఫీల ఇంకెలా ఉంటుందోనన్న అనుమానాలు వ్యక్తమవుతున్నాయి.
2023 డిసెంబర్ నాటికి నాకు ఎస్బీఐలో రూ.లక్ష అప్పు ఉంది. కానీ బ్యాంక్ నుంచి నా ఫోన్కు రూ.21,453 మాత్రమే మాఫీ అయినట్టు మెసేజ్ వచ్చింది. ప్రభుత్వం రైతుభరోసా ఇచ్చివుంటే మూడెకరాలకు 22,500 వస్తాయి. రైతుబంధుకు బదులు రుణమాఫీ చేసి నన్ను ఎటూ కాకుండా చేసిన్రు.
కాంగ్రెస్ సర్కార్ రుణమాఫీ చేస్తే వర్షాకాలం సాగుకు పెట్టుబడికి ఉపయోగపడుతుందని ఆశించా. రుణమాఫీ ప్రకటన కోసం ఎదురు చూశా. కానీ తొలివిడత జాబితాలో నా పేరు లేదు. నా ఆశలన్నీ ఆవిరయ్యాయి. ఇగ సాగుకు ప్రైవేటుగా అప్పు చేయడమే గతి. దొడ్డు ధాన్యాన్ని సైతం ప్రభుత్వం మద్దతు ధరకు కొనుగోలు చేస్తుందన్న నమ్మకం పోయింది. ఇగ మా కష్టాలు ఇలా కొనసాగాల్సిందే.
నేను కొడకండ్ల మండల కేంద్రంలోని ఎస్బీఐ బ్యాంకులో రూ.98,800 పంట రుణం తీసుకున్న. అందులో రూ.31,800 మాత్రమే మాఫీ అయినట్టు నా ఫోన్కు మెసేజ్ వచ్చింది. బ్యాంక్కు వెళ్లి తెలుసుకుందామంటే ఎవుసం పనులు చేస్తున్నం. మొత్తం రుణం మాఫీ అయిందో.. లేదో తెలుస్తలేదు. కాకుంటే ఏం చేయాలో అర్థం కావడం లేదు.
నేను 2022, జూలైలో తలమడుగులోని మహారాష్ట్ర బ్యాంకులో రూ.20 వేల పంట రుణం తీసుకున్నా. వడ్డీతోపాటు రూ.23 వేలు అయింది. ప్రభుత్వ నిబంధనల ప్రకా రం రుణమాఫీకి అర్హుడినే. బ్యాంకులో అడిగితే నీ లోన్ ఖాతాలో రూ.13,433 జమ అయినట్టు అధికారులు చెప్పారు. ఇంకా రూ.10వేలపపై స్పష్టత లేదు. బ్యాంకు, వ్యవసాయ అధికారులను అడిగినా మాకు తెలియదంటున్నారు.
మాది పాలకుర్తి నియోజకవర్గం దేవరుప్పుల. నేను ఇక్కడి యూనియన్ బ్యాంకులో లక్ష పంట రుణం తీసుకు న్నా. మాఫీ లిస్టులో నా పేరు లేదు. బ్యాంకుకు వెళ్లి అడిగితే అధికారులు ఇచ్చిన సమాధానంలో స్పష్టత లేదు. ఏ షరతు లేకుండా మాఫీ చేస్తేనే కాంగ్రెస్ ఇచ్చిన హామీ అమలు చేసినట్టవుతుంది. కాంగ్రెస్ పాలనలో రుణమాఫీ దేవుడెరుగు, రైతుబంధు కూడా ఇయ్యట్లే.
వేసవి కాలంలో వేసిన పంట పండకపోవడంతో నష్టం వచ్చింది. వర్షాకాలం చీడపీడలకు తట్టుకుని పండేది దొడ్డు వడ్లే. సన్న వడ్లకే బోనస్ అని కాంగ్రెస్ ప్రభుత్వం మాట మార్చింది. రూ.లక్షలోపు రుణమాఫీ జాబితాలో నా పేరే లేదు. ఇంతవరకు వర్షాకాలం పంట పెట్టుబడికి రైతుభరోసా కూడా రాలే. మళ్లీ వడ్డీ వ్యాపారుల నుంచి అప్పు తెచ్చి పెట్టుబడి పెట్టాల్సిన కాలం వచ్చింది.