మిర్యాలగూడ, మే 21: బస్సు ఆపలేదని ఆగ్రహం వ్యక్తం చేస్తూ మహిళలు ఆర్టీసీ బస్సు డ్రైవర్పై దాడి చేశారు. ఈ ఘటన మంగళవారం రాత్రి నల్లగొండ జిల్లా మిర్యాలగూడ ఆర్టీసీ బస్టాండ్లో చోటుచేసుకుంది. మంగళవారం సాయంత్రం దేవరకొండ ఆర్టీసీ డిపోకు చెందిన బస్సు మిర్యాలగూడకు వస్తున్న సమయంలో.. అంగడిపేట స్టేజీ వద్ద కొంతమంది మహిళలు బస్సు ఎక్కేందుకు ఆపారు. డ్రైవర్ మహిళలు ఉన్నచోట కాకుండా కొద్ది దూరం వెళ్లాక బస్సును ఆపడంతో మహిళల్లో కొద్దిమంది పరిగెత్తుకెత్తుకుంటూ వచ్చి ఎక్కారు.
ఈలోగా డ్రైవర్ బస్సును కదిలించడంతో బస్సు ఎక్కిన మహిళలు తమవాళ్లు వస్తున్నారని, బస్సు ఆపాలని కోరారు. దాంతో వెనుక మరో బస్సు వస్తున్నదంటూ బస్సును ముందుకు నడుపడంతో బస్సు ఎక్కిన మహిళలు కూడా కిందికి దిగారు. అందరూ కలిసి వెనుక వచ్చిన మరో బస్సులో మిర్యాలగూడ బస్టాండ్కు చేరుకున్నారు. డ్రైవర్ను గుర్తించి అతనిపై మహిళలు చేయిచేసుకున్నారు. డ్యూటీలో ఉన్న తనను కొట్టారంటూ డ్రైవర్ మహిళలపై కేసు పెట్టాడు. విషయం తెలుసుకున్న మహిళలు.. డ్రైవర్ తమ పట్ల అసభ్యంగా ప్రవర్తించాడని ఆరోపిస్తూ డ్రైవర్పై కేసు పెట్టారు. పోలీసులు జోక్యం చేసుకోని ఇరువురితో చర్చించి రాజీ కుదిర్చారు.