Rains | హైదరాబాద్ : అల్పపీడన ద్రోణి ప్రభావంతో రాష్ట్రంలో మూడు రోజుల పాటు భారీ వర్షాలు కురుస్తాయని వాతావరణ శాఖ వెల్లడించింది. శుక్రవారం రాత్రి నుంచి ఆదివారం వరకు పలు జిల్లాల్లో భారీ వర్షాలకు అవకాశం ఉందని పేర్కొంది. ఈ మేరకు ఆయా జిల్లాలకు ఎల్లోఅలర్ట్ హెచ్చరికలు జారీ చేసింది వాతావరణ శాఖ. ఆదిలాబాద్, ములుగు, భద్రాద్రి కొత్తగూడెం, సంగారెడ్డి, మెదక్, కామారెడ్డి తదితర జిల్లాల్లో ఉరుములు,మెరుపులు,ఈదురు గాలులతో కూడిన భారీ వర్షాలు కురుస్తాయని తెలిపింది.
శుక్రవారం ఖమ్మం జిల్లా వైరాలో 5.04 సెం.మీ, తల్లాడలో 4.34 సెం.మీ, భద్రాద్రి-కొత్తగూడెం అశ్వరావుపేటలో 4.13 సెం.మీ, కొల్లూరులో 3.82 సెం.మీ, పెనుబల్లిలో 3.27 సెం.మీ, సూర్యాపేట జిల్లా ఆత్మకూరు(ఎస్)లో 4.05, జనగామ జిల్లా దేవరుప్పలలో 3.28 సెం.మీ చొప్పున వర్షపాతం వర్షపాతం నమోదైంది. గురువారం రాత్రి తూర్పు, మధ్య తెలంగాణలోని పలుచోట్ల మోస్తరు నుంచి భారీ వర్షాలు కురిశాయి. ఉత్తర,తూర్పు, మధ్య తెలంగాణలో శుక్రవారం సాయంత్రం మోస్తరు నుంచి భారీ వర్షాలకు అవకాశం ఉందని ఐఎండీ అంచనా వేసింది.
దక్షిణ తెలంగాణలో అక్కడక్కడ తేలికపాటి జల్లులు పడతాయని పేర్కొంది. హైదరాబాద్ నగరంలోనూ సాయంత్రం వర్షం కురిసే అవకాశం ఉందని తెలిపింది. యాదాద్రి, జనగామ, మహబూబ్నగర్, సిద్ధిపేట, హన్మకొండ, వరంగల్, ములుగు, భద్రాద్రి-కొత్తగూడెం, కరీంనగర్, రాజన్న-సిరిసిల్ల, భూపాలపల్లి జిల్లాల్లోని పలు ప్రాంతాల్లో భారీ వర్షాలు పడ్డాయి. హైదరాబాద్ నగరంలోని పలుచోట్ల వర్షం కురిసింది. పలు లోతట్టు ప్రాంతాలు జలమయం అయ్యాయి. దీంతో పలు ప్రాంతాల్లో ట్రాఫిక్ అంతరాయం ఏర్పడింది. నైరుతి రుతుపవనాలు చురుకుగా మారడంతో రాబోయే రెండు వారాల్లో రాష్ట్రవ్యాప్తంగా వర్షాలు కురుస్తాయని ఐఎండీ అధికారులు తెలిపారు.
ఇవి కూడా చదవండి..
MLA Prakash Goud | కాంగ్రెస్లో చేరిన రాజేంద్రనగర్ ఎమ్మెల్యే ప్రకాశ్ గౌడ్
CM Revanth | బలమైన వ్యవస్థగా ‘హైడ్రా’ ఉండాలి.. అధికారులకు సీఎం రేవంత్ సూచన
Bandi Sanjay | ఓయూలో తిరిగి నిరుద్యోగులతో మాట్లాడే దమ్ముందా? రాహుల్ గాంధీకి బండి సంజయ్ సవాలు
Samvidhaan Hatya Diwas | ఎమర్జెన్సీకి నిరసనగా జూన్ 25న సంవిధాన్ హత్యా దివస్