హైదరాబాద్ సిటీబ్యూరో, ఆగస్టు 17 (నమస్తే తెలంగాణ): కొండలు, గుట్టలు, అటవీ ప్రాంతాలలో జన సంచారం వల్ల అక్కడి వన సంపదతోపాటు జీవరాశి మనుగడ కూడా ప్రభావితం అవుతున్నదని సీసీఎంబీ బృందం తెలిపింది. ఇటీవల పశ్చిమ కనుమల్లో పర్యటించిన సీసీఎంబీ పరిశోధకులు అక్కడి జీవరాశిపై జన సంచారం వల్ల కలుగుతున్న ప్రభావం, భూ వినియోగం వలన కలుగుతున్న మార్పులు, పర్యావరణ స్థితిగతులను పరిశీలించారు. కొండ ప్రాంతాల్లో తవ్వకాలు, వ్యవసాయం వల్ల అక్కడి అరుదైన జీవజాతులకు ప్రమాదం వాటిల్లుతుందని వారు గ్రహించారు.
దాదాపు 32 సరీసృప జాతుల మనుగుడ ప్రమాదకర స్థితిలో ఉన్నదని తమ పరిశీలనలో తేలిందని సీసీఎంబీ బృందం తెలిపింది. మహారాష్ట్రలోని రత్నగిరి కొండ ప్రాంతాలు మామిడి, జీడి, కోకుమ్ వంటి తోటలకు అనుకూలంగా ఉంది. ఇక్కడి రత్నగిరి మామిడికి ప్రపంచస్థాయి గుర్తింపు ఉండటంతో 1950 తరువాత సాగు విస్తీర్ణం మరింత పెరిగింది. దీంతో ఇక్కడ జనసంచారం పెరిగి, జంతుజాతుల మనుగడ క్రమంగా తగ్గినట్టు పరిశోధకులు గుర్తించారు. సరీసృపాలు, కీటకాల సంచారం తగ్గిపోయిందని, కొన్ని జంతుజాతులు వలస వెళ్లిపోయాయని తెలిపారు. జంతు సమూహాల పరిరక్షణకు భూ వినియోగ నియంత్రణ చర్యలు అవసరమని సీసీఎంబీ సైంటిస్టులు జితిన్ విజయన్, కులకర్ణి సూచించారు.