హైదరాబాద్, జూలై 14 (నమస్తే తెలంగాణ): రాష్ట్రవ్యాప్తంగా జరిగిన ఆటోడ్రైవర్ల ఆత్మహత్యలకు ముఖ్యమంత్రి రేవంత్రెడ్డే బాధ్యత వహించాలని బీఆర్టీయూ అనుబంధ సంఘం తెలంగాణ ఆటో, మోటర్ డ్రైవర్స్ యూనియన్ (టీఏటీయూ) రాష్ట్ర అధ్యక్షుడు మారయ్య డిమాండ్ చేశారు. ఎన్నికల ముందు ఆటోడ్రైవర్లకు కాంగ్రెస్ అనేక హామీలు ఇచ్చిందని గుర్తుచేశారు. అధికారం చేపట్టి ఏడునెలలు దాటినా వాటి ఊసెత్తకపోవడంతో ఆర్థిక ఇబ్బందులతో 58 మంది ఆటోడ్రైవర్లు ఆత్మహత్యలకు పాల్పడ్డారని ఆవేదన వ్యక్తంచేశారు. గ్రేటర్ హైదరాబాద్ పరిధిలో ఆటోడ్రైవర్లు ఎదుర్కొంటున్న సమస్యలు, దీన పరిస్థితులపై చర్చించేందుకు ఆదివారం తెలంగాణభవన్లో సమావేశం నిర్వహించారు.
ఈ సందర్భంగా మారయ్య మాట్లాడుతూ.. కాంగ్రెస్ పాలనలో ఆటోడ్రైవర్ల బతుకు అగమ్యగోచరంగా మారిందని ఆవేదన వ్యక్తంచేశారు. ఆర్టీసీ బస్సుల్లో మహిళలకు ఉచిత ప్రయాణం కారణంగా ఆటోడ్రైవర్ల ఉపాధి దెబ్బతిని 58 మంది ఆత్మహత్య చేసుకున్నా ప్రభుత్వం ఆదుకోవటం లేదని ఆగ్రహం వ్యక్తంచేశారు. కాంగ్రెస్ అధికారంలోకి వస్తే ఆటోడ్రైవర్లకు ఏటా రూ.12 వేలు ఇస్తామని, సంక్షేమ బోర్డు ఏర్పాటుచేస్తామని రేవంత్రెడ్డి, తీన్మార్ మల్లన్న పదేపదే చెప్పారని గుర్తుచేశారు. ఆటోడ్రైవర్ల చావులకు రేవంత్రెడ్డి, తీన్మార్ మల్లన్నే బాధ్యత వహించాలని డిమాండ్ చేశారు. అసెంబ్లీ బడ్జెట్ సమావేశాల్లో ఈ రెండు అంశాలపై చర్చించాలని, లేనిపక్షంలో అసెంబ్లీని ముట్టడిస్తామని హెచ్చరించారు.
గ్రేటర్ హైదరాబాద్ పరిధిలో 2 లక్షల మంది ఆటో డ్రైవర్లు ఉన్నారని, వీటిలో 90 శాతం ఆటోలు ఫైనాన్స్ మీదే నడుస్తున్నాయని మారయ్య తెలిపారు. అధిక వడ్డీతో ఆటోడ్రైవర్ల శ్రమను దోచుకుంటున్న అక్రమ ఫైనాన్స్లపై నిఘా పెట్టి వాటిని చట్టపరిధిలోకి తీసుకొచ్చి, వారి ఆగడాలను అరికట్టాలని డిమాండ్ చేశారు. షాపింగ్మాల్స్ వద్ద ఆటోస్టాండ్లు ఉండాలని, అవి లేకపోవటంతో అక్కడ నిలిపిన ఆటోడ్రైవర్లకు పోలీసులు చలాన్లు రాస్తున్నారని ఆవేదన వ్యక్తంచేశారు. గ్రేటర్లో ఆటోమీటర్ సిస్టం పెట్టాలని, మీటర్ రేట్లు కూడా పెంచాలని డిమాండ్ చేశారు. మోటర్ రంగంపై సీఎం ఇంతవరకు ఎందుకు సమీక్ష నిర్వహించలేదని ప్రశ్నించారు. సమావేశంలో బీఆర్ఎస్ రాష్ట్ర కార్యదర్శి రూప్సింగ్, టీఏటీయూ నాయకులు పాండునాయక్, రవీందర్, రామకృష్ణ, షాతం రమేశ్, నిరంజన్, హైమద్, పరశురాముడు తదితరులు పాల్గొన్నారు.