హైదరాబాద్ జూలై 16 (నమస్తే తెలంగాణ) : తెలంగాణ ఏర్పాటుకు ముందు అదే పైత్యం.. రాష్ట్ర ఆవిర్భావం తర్వాతా అదే అక్కసు. ఇప్పటికే తన చిత్రాల ద్వారా తెలంగాణ యాసను, ఆత్మగౌరవాన్ని దెబ్బతీసే ప్రయత్నం చేసిన డైరెక్టర్ పూరీ జగన్నాథ్.. తాజాగా మళ్లీ తన పైత్యాన్ని ప్రదర్శించాడు. నాడు తెలంగాణ ఉద్యమంపై అక్కసు వెళ్లగక్కిన పూరీ.. ఇప్పుడు తెలంగాణ సాధకుడినే కించపరిచే కుట్రలకు పూనుకున్నాడు.
తెలంగాణ ఉద్యమం ఉవ్వెత్తున ఎగిసిపడ్డ 2012లో పూరి జగన్నాథ్ తన దర్శకత్వంలో పవన్ కల్యాణ్తో ‘కెమెరామెన్ గంగతో రాంబాబు’ సినిమా తీశాడు. ఇది ఓ రాజకీయ నాయకుడికి, రిపోర్టర్కు మధ్య జరిగే కథ అని విడుదలకు ముందు ఇచ్చిన ఇంటర్వ్యూల్లో పూరీ చెప్పుకొచ్చాడు. తీరా విడుదలయ్యాక అది మీడియా కథ కాదు తెలంగాణ ఉద్యమం మీద కక్కిన విషమని తెలంగాణ ప్రజలకు ఇట్టే అర్థమైపోయింది.
తెలంగాణ ఉద్యమంపై తనకున్న ఏహ్యభావాన్ని సినిమాలో దుష్టపాత్రలకు అన్వయించి ప్రదర్శించారు పూరీ జగన్నాథ్. తెలంగాణ వ్యాప్తంగా ఈ సినిమాపై నిరసనలు వెల్లువెత్తడంతో చాలా కేంద్రాల్లో ప్రదర్శన నిలిచిపోయింది. ప్రేక్షకులు నిర్దంద్వంగా తిరస్కరించడంతో సినిమా డిజాస్టర్గా మిగిలిపోయింది. ఇప్పుడు తెలంగాణ ఆవిర్భవించి ప్రగతికి చిరునామాగా మారినా పూరీ వైఖరిలో మార్పు రానట్టే కనిపిస్తున్నది. పలు సందర్భంలో తెలంగాణతనాన్ని కించపరిచేలా.. హేళన చేసేలా తన చిత్రాల్లో చూపిన పూరీ, తాజాగా ‘డబుల్ ఇస్మార్ట్’తో మరోసారి తన పైత్యాన్ని చాటుకున్నాడు.
ఈ సినిమాలోని ‘మార్ ముంత చోడ్ చింత..’ అనే పాటను మంగళవారం విడుదల చేయగా అది విన్న తెలంగాణ ప్రజలు, కేసీఆర్ అభిమానులు భగ్గుమంటున్నారు. పార్టీ సాంగ్ పేరిట విడుదల చేసిన ఈ ‘కల్లు కంపౌండ్’ పాటలో హీరో, హీరోయిన్ రామ్, కావ్యా థాపర్ కల్లు బాటిళ్లు పట్టుకొని చిందేస్తుంటారు. ఓ దర్శకుడిగా తన అథమాభిరుచితో ఏ చెత్తను తెరకెక్కించినా అభ్యంతరం లేదు.
కానీ, కొన్ని కోట్ల మంది అభిమాన నాయకుడు, తెలంగాణ సాధకుడు, పదేండ్లు ఓ రాష్ర్టాన్ని పాలించిన నేత, ఎంతోమంది రాజకీయనేతలకు స్ఫూర్తిగా నిలిచే కేసీఆర్ మాటలను ఈ పాటలో వాడి ఆయన స్థాయిని తగ్గించే ప్రయత్నం చేశాడు పూరీ జగన్నాథ్. తెలంగాణ అనగానే మందుకొట్టుడే అనే పిచ్చి భావన కలిగించేలా చిత్రీకరించిన ఈ పాటలో మీడియా సమావేశంలో కేసీఆర్ మాట్లాడిన ‘ఏం జేద్దామంటవ్ మరీ..’ అనే మాటను వాడి తన వక్రబుద్ధిని చాటుకున్నాడు. పాట విడుదలైన కొన్ని గంటల్లోనే సోషల్ మీడియా వేదికగా తెలంగాణవాదులు తీవ్ర అభ్యంతరం వ్యక్తంచేస్తూ పూరీపై మండిపడుతున్నారు.
పాట బాధ్యత పూరీదే
ఈ పాటలో కేసీఆర్ ‘హుక్లైన్’ను దురుద్దేశపూర్వకంగానే పెట్టారనే వాదనలు వినిపిస్తున్నాయి. ఈ పాటను స్వరపరచింది మణిశర్మ కాగా, రాసింది కాసర్ల శ్యామ్. సినిమా పాటల విషయంలో దర్శకులదే అంతిమ నిర్ణయం ఉంటుంది. డైరెక్టర్ ఓకే చేసిన తర్వాతే పాటను విడుదల చేస్తారు. సాధారణంగా మ్యూజిక్ సిట్టింగ్స్లో దర్శకుడు, సంగీత దర్శకుడు, గీత రచయిత పాలుపంచుకుంటారు. దర్శకుడి సూచనల మేరకే మ్యూజిక్ డైరెక్టర్, లిరిక్ రైటర్ పాటలో మార్పులు చేస్తారు.
అంటే ఈ పాటలోని హుక్లైన్ను పూరీ నిర్ణయం మేరకే పెట్టారని భావిస్తున్నారు. మరోవైపు గీత రచయిత కాసర్ల శ్యామ్పైనా సోషల్మీడియాలో విమర్శలు వెల్లువెత్తుతున్నాయి. తెలంగాణ ప్రాంతం వాడై ఉండి అలాంటి హుక్లైన్ను ఎందుకు రాయాల్సి వచ్చిందని ప్రశ్నిస్తున్నారు. కాసర్ల శ్యామ్తోపాటు గాయకుడు రాహుల్ సిప్లిగంజ్ కూడా తెలంగాణ వాడే కావడాన్ని తెలంగాణవాదులు, ఇక్కడి సంగీత ప్రియులు జీర్ణించుకోలేకపోతున్నారు.
సోషల్మీడియాలో మ్యూజింగ్స్ పేరుతో పలు సామాజిక అంశాలపై నీతులు వళ్లించే దర్శకుడు పూరీ జగన్నాథ్ ఇలాంటి చవకబారు పాటలో ఒక మాజీ ముఖ్యమంత్రి మాటలు ఎలా పెట్టారని ప్రశ్నిస్తున్నారు. పాటలో కేసీఆర్ మాటలను వెంటనే తొలగించి దర్శకుడు పూరీ జగన్నాథ్ బేషరతుగా క్షమాపణ చెప్పాలని డిమాండ్ చేస్తున్నారు.
తెలంగాణ ఏర్పాటు తర్వాత ఇక్కడి సినిమా స్వరూపమే మారిపోయింది. తెలంగాణ మట్టి కథలు వెండితెర దృశ్యమానమవుతున్నాయి. తెలంగాణ భాష, యాసలతో రూపొందించే చిత్రాలకు ప్రేక్షకులు బ్రహ్మరథం పడుతున్నారు. పదేండ్లలో ఎందరో ప్రతిభావంతులైన సాంకేతిక నిపుణులు తెలంగాణ నుంచి సత్తాచాటారు. ఈ తరుణంలో తెలంగాణ అస్తిత్వాన్ని కించపరిచే చర్యలు మళ్లీ సినీరంగంలో విభజనకు దారితీసే పరిస్థితులను సృష్టిస్తాయని పలువురు అభిప్రాయపడుతున్నారు.