హైదరాబాద్, జూలై 5 (నమస్తే తెలంగాణ)/సుల్తాన్బజార్ : ఆర్టీసీ బస్సులో నిండు గర్భిణికి ప్రసవం చేసి ప్రభుత్వ దవాఖానలో చేర్పించి డ్రైవర్, కండక్టర్ మానవత్వం చాటుకున్నారు. ముషీరాబాద్ డిపోకు చెందిన బస్సు(టీఎస్02జెడ్ 0341)శుక్రవారం ఉదయం ఆరాంఘర్ నుంచి సికింద్రాబాద్కు బయల్దేరింది. ఇదే బస్సులో శ్వేతారత్నం అనే నిండు గర్భిణి ఎక్కింది.
బస్సు బహదూర్పురాకు చేరుకోగానే గర్భవతికి నొప్పులు అధికమవడంతో డ్రైవర్ ఎంఎం అలీ బస్సును పక్కన నిలిపి ప్రయాణికులను కిందికి దించాడు. ఈ క్రమంలో కండక్టర్ సరోజ తోటి మహిళా ప్రయాణికుల సాయంతో గర్భిణికి ప్రసవం చేయగా, పండంటి ఆడబిడ్డకు జన్మనిచ్చింది. ప్రసవం అనంతరం తిరిగి అదే బస్సులో పురానాపూల్ ప్రభుత్వ ప్రసూతి దవాఖానలో తల్లీబిడ్డలను అడ్మిట్ చేయించారు.
ప్రస్తుతం వారు క్షేమంగా ఉన్నారు. ప్రత్యేక చొరవ చూపిన డ్రైవర్, కండక్టర్ను ప్రయాణికులు అభినందించారు. విషయం తెలుసుకున్న టీజీఆర్టీసీ హైదరాబాద్ రీజియన్ మేనేజర్ వరప్రసాద్ ఎంజీబీఎస్లోని తన కార్యాలయంలో డ్రైవర్, కండక్టర్ను సన్మానించారు. రవాణా శాఖ మంత్రి పొన్నం ప్రభాకర్, ఆర్టీసీ ఎండీ సజ్జనార్ వారిని అభినందించారు. సన్మాన కార్యక్రమంలో హైదరాబాద్ డిప్యూటీ రీజినల్ మేనేజర్ జగన్, బర్కత్పుర, కాచిగూడ డీఎంలు వేణు, రఘు, ముషీరాబాద్ ఏడీఎం కల్యాణి పాల్గొన్నారు.