కాళేశ్వరం, ఏప్రిల్ 14: ప్రాణహిత నది పుష్కరాల్లో భాగంగా జయశంకర్ భూపాలపల్లి జిల్లా కాళేశ్వరం, మంచిర్యాల జిల్లాలోని కోటపల్లి మండలం అర్జున గుట్ట, వేమనపల్లి ఘాట్లకు భక్తులు పెద్ద సంఖ్యలో తరలివచ్చారు. రెండో రోజైన గురువారం సుమారు 50 వేలమందికిపైగా భక్తులు వచ్చినట్టు ఆలయ అధికారులు అంచనా వేశారు. త్రివేణి సంగమంలోని గోదావరి నదితోపాటు ప్రాణహిత నదుల్లో భక్తులు పుష్కర స్నానాలు ఆచరించిన అనంతరం గోదావరి మాతకు ప్రత్యేక పూజలు చేసి సైకత లింగాలను పూజించారు. అనంతరం కాళేశ్వరంలోని ముక్తీశ్వర స్వామిని దర్శించుకొన్నారు. అటు మహారాష్ట్ర, ఛత్తీస్గఢ్ రాష్ర్టాల నుంచి కూడా భక్తులు భారీగా రావడంతో కాళేశ్వరం వద్ద త్రివేణి సంగమం కిటకిటలాడింది. సాయంత్రం నదికి ఏక హారతి ఇచ్చారు.