కొత్తపల్లి, జూన్ 15: నేతన్నల ఆకలిచావులు మళ్లీ మొదలయ్యాయి. కాంగ్రెస్ సర్కారు ప్రోత్సాహం లేక, ఉపాధి కరువై, బతుకుభారమై ఇటీవలే పలువురు కార్మికులు బలవన్మరణం చెందగా.. తాజాగా కరీంనగర్ జిల్లా కొత్తపల్లిలో రైలు పట్టాలపై పడుకొని మరో కార్మికుడు ఆత్మహత్య చేసుకున్నాడు. కొత్తపల్లి పట్టణంలోని రెడ్డిరామయ్యపల్లిలో నివాసం ఉండే బొల్లబత్తిని వెంకటేశం (63)కు భార్య ఇందిర, కొడుకు రంజిత్, కూతురు సౌమ్య ఉన్నారు. భార్య ఇంటివద్దే ఉంటున్నది. కొడుకు బీటెక్ పూర్తి చేసి ఉద్యోగవేటలో ఉన్నాడు. కూతురు సౌమ్య ఎంబీఏ చదువుతున్నది. పదేండ్లుగా వెంకటేశం సిరిసిల్ల పట్టణంలో పవర్లూం కార్మికుడిగా పనిచేస్తున్నాడు. ఇంతలో.. రాష్ట్రంలో అధికారంలోకి వచ్చిన కాంగ్రెస్ ఆరు నెలలుగా పవర్లూం కార్మికులను పట్టించుకోవడం లేదు. ఫలితంగా ఉపాధి కరువై.. కుటుంబ పోషణ భారమై రోడ్డున పడే పరిస్థితి వచ్చింది. రోజూ సిరిసిల్లకు వెళ్తూ ఏం పని దొరక్క వచ్చేవాడని, కుటుంబాన్ని ఎలా పోషించుకోవాలని తరచూ బాధపడేవాడని కుటుంబ సభ్యులు పేర్కొన్నారు. ఈ క్రమంలో శుక్రవారం సాయంత్రం పనికోసం సిరిసిల్ల వెళ్తున్నానని కుటుంబ సభ్యులకు చెప్పిన వెంకటేశం.. కొత్తపల్లి రైల్వేస్టేషన్ పట్టాలపై శవమై కనిపించాడు. శనివారం తెల్లవారుజామున ఆత్మహత్యకు పాల్పడి ఉంటాడని రైల్వే పోలీసులు భావిస్తున్నారు. జేబులో ఉన్న ఆధార్కార్డు ఆధారంగా అడ్రస్ గుర్తించి జీఆర్పీ పోలీసులు కుటుంబ సభ్యులకు సమాచారం అందించారు. పోస్ట్మార్టం నిమిత్తం మృతదేహాన్ని కరీంనగర్లోని ప్రభుత్వ దవాఖానకు తరలించారు. ఇంటికి పెద్దదిక్కైన వెంకటేశం ఆత్మహత్య చేసుకోవడంతో కుటుంబ సభ్యులు గుండెలవిసేలా రోదిస్తున్నారు. ఇక తమకు దిక్కెవరున్నారు? కూతురు పెండ్లి ఎలా చేయాలి? అంటూ భార్య ఇందిర రోదించింది. తమ కుటుంబాన్ని ప్రభుత్వం ఆదుకోవాలని వేడుకుంటున్నది.