Congress Govt | హైదరాబాద్, జూలై 17 (నమస్తే తెలంగాణ) : ఎన్నికల సందర్భంగా ఇచ్చిన హామీ ప్రకారం గ్రూప్-2, 3 నోటిఫికేషన్లో అదనపు పోస్టులు కలపడమా? ఆగస్టు 7, 8 తేదీల్లో నిర్వహించే గ్రూప్ 2, నవంబర్ 17, 18 తేదీల్లో ఉన్న గ్రూప్-3 పరీక్షలు వాయిదా వేయాలా? అనే అంశాలపై ప్రభుత్వం తర్జనభర్జన పడుతున్నది. ఈ డిమాండ్ల సాధన కోసం నిరుద్యోగులు పోరాడుతుంటే కొందరు తటస్థంగా ఉన్నారు. ఇదే అదనుగా ప్రభుత్వం ఓ వర్గానికి ఒకలా, మరో వర్గానికి మరోలా నచ్చజెబుతూ మభ్యపెడుతున్నట్టు నిరుద్యోగులు ఆరోపిస్తున్నారు. కాంగ్రెస్ ఇచ్చిన హామీ మేరకు ప్రభుత్వం గ్రూప్స్ నోటిఫికేషన్లో అదనంగా పోస్టులు కలిపి, సన్నద్ధత కోసం పరీక్షలు వాయిదా వేస్తుందని కొందరు నమ్ముతుండగా.. గురువారం నుంచి మొదలయ్యే డీఎస్సీ పరీక్షలనే వాయిదా వేయని సర్కారు గ్రూప్స్ను ఎలా వేస్తుందని మరికొందరు వాదిస్తున్నారు. ఇటు వాయిదా, అటు పోస్టుల పెంపుపై ప్రభుత్వం నుంచి స్పష్టత రాక నిరుద్యోగులకు సతమతమవుతున్నారు.
చర్చలు జరిపినా ఫలితం శూన్యం
దాదాపు పది డిమాండ్లపై నిరుద్యోగులతో రాష్ట్ర ప్రభుత్వం తరఫున కొందరు ప్రతినిధులు చర్చలు జరిపినా కొలిక్కి రాలేదని తెలిసింది. కొందరు నిరుద్యోగులతో మంత్రి పొన్నం ప్రభాకర్ చర్చలు జరిపి, డీఎస్సీ వాయిదా ప్రసక్తే లేదని చెప్పినట్టు సమాచారం. గ్రూప్స్ అంశంపై రాష్ట్ర ప్రభుత్వం సానుకూలంగా ఉన్నట్టు చెబుతున్నా.. స్పష్టత ఇవ్వలేదని నిరుద్యోగులు వాపోతున్నారు.
కొనసాగుతున్న ఉద్యమాలు..
చర్చల పేరిట ప్రభుత్వం కాలయాపన చేస్తూ ఉద్యమాన్ని నీరుగార్చే ప్రయత్నం చేస్తున్నదని అభ్యర్థులు ఆరోపిస్తున్నారు. డీఎస్సీ పరీక్షలు వాయిదా వేసే అవకాశం ఉన్నా నేటి నుంచి యథావిధిగా పరీక్షల నిర్వహణకు ప్రభుత్వం ముందుకు పోతున్నదని, ప్రభు త్వ వైఖరి చూస్తుంటే గ్రూప్-2 పరీక్షలు కూ డా వాయిదా వేసే అవకాశం లేదని భావిస్తున్నారు. మరోవైపు తమ డిమాండ్ల సాధన కోసం ఉద్యమాలను కొనసాగిస్తున్నారు.