హైదరాబాద్ సిటీబ్యూ రో, అక్టోబర్ 9 (నమస్తే తెలంగాణ): రాష్ట్ర శాసనసభ ఎన్నికల్లో బీఆర్ఎస్ వరుసగా మూడోసారి విజయం సాధించడం, కేసీఆర్ మళ్లీ సీఎం కావడం ఖాయమని హైదరాబాద్ ఎంపీ, ఎంఐఎం అధినేత అసదుద్దీన్ ఒవైసీ స్పష్టం చేశారు. తెలంగాణలో గత పదేండ్లుగా జరిగిన అభివృద్ధి స్పష్టంగా కనిపిస్తున్నదని చెప్పారు. శాంతి భద్రతలు ఎంతో బాగున్నాయని, ఇటీవల హైదరాబాద్లో వినాయక నిమజ్జనం, మిలాద్ ఉన్ నబీ వేడుకలను ప్రజలు సామరస్యంగా జరుపుకోవడమే ఇందుకు నిదర్శనమని వివరించారు. తెలంగాణ సహా ఐదు రాష్ర్టాల్లో అసెంబ్లీ ఎన్నికల నిర్వహణకు షెడ్యూల్ విడుదలవడంతో సోమవారం ఆయన మీడియాతో మాట్లాడారు.
తెలంగాణలో పోటీచేసే ఎంఐఎం అభ్యర్థులను త్వరలో ప్రకటిస్తామని చెప్పారు. నవంబర్ 23న జరిగే రాజస్థాన్ అసెంబ్లీ ఎన్నికల్లో ఎంఐ ఎం 3 స్థానాల నుంచి పోటీచేస్తుందని, అభ్యర్థులను ఇప్పటికే ప్రకటించామని తెలిపారు. అల్ప సంఖ్యాక వర్గాలకు సామాజిక న్యాయం జరగాలన్నది తమ పార్టీ ఉద్దేశమని పేర్కొన్నారు. కర్ణాటక ఎన్నికల సందర్భంగా కాంగ్రెస్కు సీఎం కేసీఆర్ ఆర్థిక సాయం చేసినట్టు ప్రధాని మోదీ ఆరోపించారని, అదే సమయం లో ఇక్కడి కాంగ్రెస్ నాయకులు బీఆర్ఎస్ను బీజేపీకి బీ టీమ్ అంటున్నాయని గుర్తుచేస్తూ.. ఇదేం వైఖరని ప్రశ్నించారు. ప్రస్తుత టీపీసీసీ అధ్యక్షుడు రేవంత్ గతంలో ఆర్ఎస్ఎస్, బీజేపీతో కలిసి పనిచేసిన విషయం తనకు తెలుసని అసద్ పేర్కొన్నారు.