Current | హైదరాబాద్, జూన్ 19 (నమస్తే తెలంగాణ): రాష్ట్రం ఉమ్మడిగా ఉన్నప్పుడు విద్యుత్తు విషయంలో పాలకులు ఘోర తప్పిదాలు చేశారు. అనేక తప్పుడు విధానాలను అనుసరించి ప్రజాధనాన్ని ఇష్టారీతిన ప్రైవేట్ కంపెనీలకు దోచిపెట్టారు. కరెంట్ ఇవ్వని కంపెనీలకు రూ.కోట్ల బిల్లులు కట్టమెట్టి విద్యుత్తు సంస్థలను గుల్ల చేశారు. ఈ పాపాల్లో అప్పటి టీడీపీ, కాంగ్రెస్ ప్రభుత్వాలకు సమాన వాటా ఉన్నది. అయినా ఇవేమీ పట్టని ప్రస్తుత కాంగ్రెస్ సర్కారు, ఆ పార్టీ నేతలు ఛత్తీస్గఢ్ విద్యుత్తు ఒప్పందం విషయంలో కోడిగుడ్డు మీద ఈకలు పీకినట్టు వ్యవహరిస్తూ ప్రజలను పూర్తిగా తప్పుదోవపట్టిస్తున్నారు.
గ్యాస్ ఆధారిత విద్యుత్తు ఉత్పత్తి కంపెనీలతో గత ప్రభుత్వాలు 1996 నుంచి 2007 మధ్య కాలానికి 8 దీర్ఘకాలిక ఒప్పందాలు చేసుకున్నాయి. మొత్తం 2,494 మెగావాట్ల విద్యుత్తు కొనుగోలు కోసం జీవీకే ఇండస్ట్రీస్, స్పెక్ట్రమ్, లాంకో (కొండపల్లి), జీవీకే ఎక్స్టెన్షన్, గౌతమి పవర్, జీఎమ్మార్ వేమగిరి, కోనసీమ గ్యాస్ పవర్ లిమిటెడ్ కంపెనీలతో అప్పటి ఏపీ ఎస్ఈబీ, డిస్కంలు ఈ ఒప్పందాలను కుదుర్చుకున్నాయి. అప్పట్లో గ్యాస్ లభ్యత ఉన్నదా? లేదా? అని చూడకుండా, కనీసం స్క్రూటినీ కూడా చేయకుండా ఈ పీపీఏలను కుదుర్చుకున్నారు. పైన పేర్కొన్న కంపెనీలు ఫిక్స్డ్ కాస్ట్, ఫ్యూయల్ కాస్ట్, ఆల్టర్నేటివ్ ఫ్యూయల్ కాస్ట్ పేరిట ఏకంగా రూ.6,393 కోట్లు చెల్లించాలని ప్రభుత్వంతో పేచీకి దిగాయి. ఈ అంశం సుప్రీంకోర్టు వరకు వెళ్లింది. ఒకవేళ కోర్టు తీర్పు ప్రభుత్వానికి వ్యతిరేకంగా వస్తే తెలంగాణ ప్రభుత్వం, డిస్కంలు రూ.3,445 కోట్లు (53.89 శాతం) చెల్లించాల్సి ఉంటుంది. ఉమ్మడి రాష్ట్రంలో జరిగిన ఈ నిర్వాహకంపై ఎవరూ నోరు మెదపడం లేదు. తప్పు జరిగిందని చెప్పడం లేదు.
తెలంగాణ ఏర్పాటు తర్వాత బీఆర్ఎస్ సర్కారు ఛత్తీస్గఢ్ నుంచి విద్యుత్తును తీసుకొచ్చి రాష్ర్టాన్ని వెలుగులమయం చేయడాన్ని జీర్ణించుకోలేక కాంగ్రెస్ నేతలు ఇప్పుడు నిందలుమోపుతున్నారు. విచారణ కమిషన్ పేరిట విషబీజాలు నాటుతున్నారు. బీఆర్ఎస్ హయాంలో ఏదో తప్పిదం జరిగిపోయినట్టు, ఒక తప్పును ఒప్పని వందసార్లు అంటే ఒప్పే అవుతుందన్నట్టు విష ప్రచారం చేస్తున్నారు. వాస్తవానికి ఇది రెండు రాష్ట్ర ప్రభుత్వాల మధ్య కుదిరిన ఒప్పందం. దీనిలో భాగంగా ఛత్తీస్గఢ్ నుంచి తెలంగాణకు 17,996 మిలియన్ యూనిట్ల విద్యుత్తు సరఫరా అయ్యిందని సాక్షాత్తూ ప్రభుత్వ వర్గాలే అంగీకరిస్తున్నాయి.
ఇలా అంగీకరిస్తూనే ఆ ఒప్పందం తెలంగాణకు భారమైందనడం, రెండు నాల్కల ధోరణితో వ్యవహరించడం కాంగ్రెస్ నేతలకే చెల్లింది. ‘ఉల్టా చోర్ కొత్వాల్ కో డాంటే’ అన్నట్టుగా వ్యవహరిస్తున్న రేవంత్రెడ్డి ప్రభుత్వం.. రాష్ట్రంలో వ్యవసాయానికి, ఇతర వినియోగదారులకు నాణ్యమైన కరెంట్ ఇవ్వలేకపోయింది. విద్యుత్తు కోతలను తెచ్చిపెట్టి, అంతర్గత సమస్యలంటూ కుంటిసాకులు చెప్తున్నది. రాష్ట్రంలో 90 లక్షల కుటుంబాలకు తెల్ల రేషన్కార్డులు ఉంటే 30 లక్షల కుటుంబాలకే ‘గృహజ్యోతి’ పథకాన్ని అమలు చేస్తున్నది. దీంతో రాష్ట్రవ్యాప్తంగా ధర్నాలు, సబ్స్టేషన్ల ముట్టడి లాంటి నిరసనలు సర్వసాధారణమయ్యాయి. వీటి నుంచి ప్రజల దృష్టిని మళ్లించేందుకే కమిషన్ల పేరుతో రేవంత్ సర్కారు నాటకమాడుతున్నదని రాజకీయ విశ్లేషకులు అభిప్రాయపడుతున్నారు.