కరీంనగర్, మే 8 (నమస్తే తెలంగాణ): సాక్షాత్తు ప్రధానమంత్రి వేములవాడకు వస్తున్నారంటే.. రాజన్న పుణ్యక్షేత్రం అభివృద్ధికి నిధులు ప్రకటిస్తారని ఆశించామని, కానీ.. ఒక్క హామీ ఇవ్వకుండా.. కేవలం రాజకీయ సభకు హాజరై వెళ్లిపోయారని బీఆర్ఎస్ కరీంనగర్ ఎంపీ అభ్యర్థి బోయినపల్లి వినోద్కుమార్ అసంతృప్తి వ్యక్తంచేశారు. నవోదయ పాఠశాలలు ఇచ్చారా? మెడికల్ కళాశాలలు ఇచ్చారా? జాతీయ ప్రాజెక్టులు ఇచ్చారా? రాష్ర్టానికి ఏమీ చేయలేని బీజేపీకి ఓట్లు ఎందుకు వేయాలని నిలదీశారు. దేవుళ్ల పేరు చెప్పి రాజకీయం చేస్తున్న బండి సంజయ్ కావాలో,అనునిత్యం అభివృద్ధి కోసం తపించే తాను కావాలో కరీంనగర్ ప్రజలు ఆలోచించి నిర్ణయం తీసుకోవాలని కోరారు.
కరీంనగర్లోని తన క్యాంపు కార్యాలయంలో బుధవారం ఏర్పాటు చేసిన మీడియా సమావేశం లో ఆయన మాట్లాడారు. ప్రధాని నరేంద్ర మోదీ వేములవాడకు వచ్చి రాజన్న దర్శనం చేసుకున్నారని, అయితే.. ఆలయ అభివృద్ధికి ఒక్క పైసా హామీ ఇవ్వకుండా వెళ్లిపోయారని మండిపడ్డారు. దక్షిణ కాశీగా పేరుగాంచిన వేములవాడను వారణాసిలా అభివృద్ధి చేస్తారని ఆశించామని, కానీ ఆయన కేవలం రాజకీయాల కోసమే వేములవాడకు వచ్చినట్టు స్పష్టమైందని తెలిపారు. ఇంతటి పుణ్యక్షేత్రంలో సభ ఏర్పాటు చేసి.. ఆలయ అభివృద్ధి కోసం బండి సంజయ్ అయినా ప్రధానిని ఒక్క రూపాయి అడుగకపోవడం ఆయన అసమర్థతకు నిదర్శనమని ఎద్దేవా చేశారు.
తాను ఎంపీగా ఉన్నపుడు కేంద్ర ప్రభుత్వం అమలు చేసిన ‘ప్రసాద్’ పథకంలో వేములవాడ, కొండగట్టు దేవాలయాలను చేర్చాలని అప్పటి కేంద్ర మంత్రి శర్మకు వినతి పత్రం సమర్పించామని గుర్తుచేశారు. వేములవాడ గుడికి నిధులు ఇవ్వాలని కోరిన లేఖలను ఈ సందర్భంగా వినోద్కుమార్ మీడియా ముందు ప్రదర్శించారు. వేములవాడ పుణ్యక్షేత్రం అభివృద్ధి కోసం తెలంగాణ తొలి ముఖ్యమంత్రి కే చంద్రశేఖర్రావు 32 ఎకరాల స్థలాన్ని కేటాయించారని, ఈ భూమిలో విస్తరణ పనులు చేపట్టారని తెలిపారు. రాజకీయాల కోసం ఎస్సీ, ఎస్టీలను భయాందోళనకు గురిచేయడం సమంజసం కాదని పేర్కొన్నారు. ఈ సమావేశంలో ఎమ్మెల్సీలు ఎల్ రమణ, భానుప్రసాద్రావు, నగర మేయర్ వై సునీల్రావు, నగర అధ్యక్షుడు చల్ల హరిశంకర్, సివిల్ సప్లయ్స్ కార్పొరేషన్ మాజీ చైర్మన్ సర్దార్ రవీందర్సింగ్ తదితరులు పాల్గొన్నారు.