Telangana Budget | హైదరాబాద్, జూలై 25(నమస్తే తెలంగాణ): బడ్జెట్లో వ్యవసాయానికి రూ.72 వేల కోట్లతో భారీ మొత్తంలో నిధులు కేటాయించామని ప్రభుత్వం చెప్తున్నప్పటికీ, కాంగ్రెస్ హామీ ఇచ్చిన రైతు పథకాల అమలుకు ఈ నిధులు ఏమాత్రం సరిపోవనే అభిప్రాయాలు వ్యక్తమవుతున్నాయి. ప్రతి పథకానికీ అవసరమైన నిధుల్లో ప్రభుత్వం కోతలు పెట్టిందని వ్యవసాయ శాఖ నిపుణులు విశ్లేషిస్తున్నారు. తద్వారా ఆయా పథకాల్లో కోతలు ఖాయమనే అభిప్రాయాన్ని వ్యక్తంచేస్తున్నారు. లబ్ధిదారుల సంఖ్యలో అడ్డంగా కోతలు పెడితేనే ప్రస్తుతం కేటాయించిన నిధులు సరిపోతాయని చెప్తున్నారు. లేనిపక్షంలో ఈ నిధులు ఏ మూలకూ సరిపోవని అంటున్నారు.
రుణమాఫీ: బడ్జెట్లో ప్రభుత్వం రుణమాఫీకి రూ.26 వేల కోట్లు కేటాయించింది. ప్రతి రైతుకు రూ.2 లక్షల రుణమాఫీ కోసం రూ.31 వేల కోట్లు అవసరమవుతాయని గతంలో ప్రభుత్వమే తెలిపింది. కానీ, బడ్జెట్ కేటాయింపులు అందుకు తగ్గట్టుగా లేవు. ప్రభుత్వ అంచనాకీ, కేటాయింపుకీ మధ్య రూ.5 వేల కోట్ల లోటు కనిపిస్తున్నది. అంటే ఈ మేరకు రుణమాఫీలో లబ్ధిదారుల సంఖ్యలో కోత పెడతారనే అభిప్రాయాలు వ్యక్తమవుతున్నాయి.
రైతుభరోసా: ప్రభుత్వం రైతుభరోసా(రైతుబంధు)కు రూ.15,075 కోట్లు కేటాయించింది. వాస్తవానికి కాంగ్రెస్ పార్టీ మ్యానిఫెస్టోలో ప్రతి రైతుకు ఎకరానికి రూ.15 వేల చొప్పున పెట్టుబడి సాయం అందిస్తామని హామీ ఇచ్చింది. రాష్ట్రంలో 69 లక్షల మంది రైతులకు 153 లక్షల ఎకరాల భూమి ఉన్నది. వీటికి యథాతథగా ఇచ్చేందుకు కనీసం రూ.23 వేల కోట్ల నిధులు అవసరం. కానీ ప్రభుత్వం రూ.15 వేల కోట్లు మాత్రమే కేటాయించింది.
అవసరానికన్నా రూ.8 వేల కోట్లు తక్కువగా కేటాయించింది. గతంలో బీఆర్ఎస్ ప్రభుత్వం ఎకరానికి రూ.10 వేల చొప్పున సాయం అందించేందుకు రూ.15 వేల కోట్లు కేటాయించింది. ఇప్పుడు ఎకరానికి రూ.15 వేలు ఇస్తామని చెప్పి, అంతే నిధులు కేటాయిస్తే ఏ విధంగా ఈ పథకాన్ని అమలుచేస్తారనే ప్రశ్నలు వినిపిస్తున్నాయి. ఆ మేరకు కొంతమంది రైతులకు రైతుభరోసాలో ఎగనామం పెడతారని స్పష్టమవుతున్నది.
వ్యవసాయ కూలీలకు…
ఈ ఏడాది నుంచి వ్యవసాయ కూలీలకు కూడా ఏడాదికి రూ.12 వేల చొప్పున భరోసా ఇస్తామని ప్రభుత్వం ప్రకటించింది. ఇందుకోసం రూ.1,200 కోట్లు కేటాయించింది. రాష్ట్రంలో ఉపాధి హామీ కార్డులు సుమారు 50 లక్షలు ఉన్నాయి. ఈవిధంగా కార్డుకు ఒకరికి భరోసా ఇచ్చినా రూ.6 వేల కోట్లు అవసరం.. కానీ, ప్రభుత్వం రూ.1,200 కోట్లు మాత్రమే కేటాయించింది. దీంతో వ్యవసాయ కూలీలు అందరికీ భరోసా ఇచ్చే అవకాశం లేదని స్పష్టమవుతున్నది.
పంటలకు బోనస్
కాంగ్రెస్ అధికారంలోకి వస్తే వరి ధాన్యానికి క్వింటాలుకు రూ.500 బోనస్ ఇస్తామని హామీ ఇచ్చింది. బడ్జెట్లో రూ.1,800 కోట్లు కేటాయించింది. ఈ నిధులు ఏ మాత్రం సరిపోవనే అభిప్రాయాలు వ్యక్తమవుతున్నాయి. ఏడాదికి రెండు సీజన్లు కలిపి సుమారు 50-60 లక్షల టన్నుల సన్నాలు కొనుగోలు చేయాల్సి ఉంటుంది. ఈ లెక్కన రూ.2,500 నుంచి రూ.3వేల కోట్లు అవసరం. అయితే ప్రభుత్వం రూ.1800 కోట్లతో సరిపెట్టింది. మిగిలిన పంటలకు కూడా బోనస్ ఇస్తామని చెప్పిన ప్రభుత్వం.. ఈ బడ్జెట్లో ఒక్క వరికి మాత్రమే కేటాయించి చేతులు దులుపుకున్నది.