Jagtial | కథలాపూర్, జూలై 7: జగిత్యాల జిల్లా కథలాపూర్ మండలం సిరికొండకు చెందిన మారిశెట్టి ఐరా (ఐదు నెలల చిన్నారి) 135 ఫ్లాష్ కార్డులను అవలీలగా గుర్తిస్తూ అద్భుత ప్రతిభను చాటుతున్నది. చిన్నారి జ్ఞాపకశక్తిని చూసి అందరూ ఆశ్చర్యపోతున్నారు. ఏకంగా నోబెల్ బుక్ ఆఫ్ వరల్డ్ రికార్డు సొంతం చేసుకోవడం విశేషం. సిరికొండ గ్రామానికి చెందిన మారిశెట్టి మహేందర్-మౌనిక దంపతులకు ఐదు నెలల కూతురు ఐరా ఉంది.
మహేందర్ సాఫ్ట్వేర్ ఇంజినీర్గా పనిచేస్తున్నాడు. బాలికకు రెండు నెలల వయసు నుంచి తల్లిదండ్రులు వివిధ రకాల వస్తువులు, బొమ్మలు చూపించి వాటిని గుర్తుపట్టేలా అవగాహన కల్పించారు. తల్లిదండ్రుల ప్రోత్సాహంతో కొన్ని నెలల తర్వాత చిన్నారి ఐరా సుమారు 135 రకాల విభిన్న ఫ్లాష్ కార్డులను గుర్తుపట్టింది. ఈ ఫ్లాష్ కార్డుల్లో జంతువులు, సంఖ్యలు, రకరకాల రంగులు, వివిధ దేశాల జెండాలు, జంతువుల బొమ్మలు ఉన్నాయి.
గతంలో నోబెల్ బుక్ ఆఫ్ వరల్డ్ రికార్డు సొంతం చేసుకున్న ఓ ఐదు నెలల చిన్నారి 120 ఫ్లాష్ కార్డులు మాత్రమే గుర్తు పట్టినట్టు సంస్థ పేర్కొంది. తాజాగా సిరికొండకు చెందిన ఐదు నెలల చిన్నారి ఐరా 135 రకాల ఫ్లాష్ కార్డులు గుర్తించడంతో తల్లిదండ్రుల్లో సంతోషం వ్యక్తమైంది. ఫ్లాష్ కార్డులు గుర్తుపడుతున్న వీడియోలు, ఫొటోలు నోబెల్ బుక్ ఆఫ్ వరల్డ్ రికార్డు సంస్థకు పంపించడంతో.. వారు ఐరాను నోబెల్ బుక్ ఆఫ్ వరల్డ్ రికార్డుకు ఎంపిక చేసినట్టు సంస్థ ప్రతినిధులు తల్లిదండ్రులకు సమాచారం అందించారు. ప్రశంసాపత్రం, మెడల్స్ను పోస్టులో పంపించారు. చిన్నారి ప్రతిభను ప్రభుత్వ విప్ ఆది శ్రీనివాస్ అభినందించారు.