జయశంకర్ భూపాలపల్లి, అక్టోబర్ 10(నమస్తే తెలంగాణ): ‘ఎన్నికలు ఏవైనా మేం బీఆర్ఎస్ వెంటే ఉంటం.. కారు గుర్తుకే మా ఓటు.. ఏ పార్టీకీ ఇక్కడ చోటు లేదు.. మా ఓటు గండ్ర వెంకటరమణారెడ్డికే’ అని జయశంకర్ భూపాలపల్లి జిల్లా భూపాలపల్లి మండలం గుడాడ్పల్లి గ్రామస్థులు స్పష్టం చేశారు. ప్రభుత్వం ఇటీవల గుడాడ్పల్లి నిరుపేదలకు 40 డబుల్ బెడ్రూం ఇండ్లను మంజూరు చేసింది.
ఆ నిరుపేదలందరూ మంగళవారం గృహప్రవేశం చేశారు. ఈ కార్యక్రమానికి భూపాలపల్లి బీఆర్ఎస్ అభ్యర్థి గండ్ర వెంకటరమణారెడ్డి, ఆయన సతీమణి గండ్ర జ్యోతిని ఆహ్వానించి కృతజ్ఞత సభను ఏర్పాటు చేశారు. గ్రామానికి చేరుకున్న గండ్ర దంపతులకు గ్రామస్థులు ఘనంగా స్వాగతం పలికారు. ఇంటింటికీ పిలిచి బొట్టుపెట్టి శాలువాలతో సన్మానించారు. అనంతరం గ్రామ సర్పంచ్ ఉడుత లక్ష్మీఐలయ్య యాదవ్ అధ్యక్షతన నిర్వహించిన కృతజ్ఞత సభలో.. ‘గ్రామస్థులందరూ గండ్ర వెంకటరమణారెడ్డి వెంటే ఉంటారు.
ఆది నుంచి మా గ్రామం బీఆర్ఎస్ వెంటే ఉన్నదని, ఇప్పుడు కూడా మీ వెంటే ఉంటది’ అని హామీ ఇచ్చారు. ఈ సందర్భంగా ఇదే గ్రామానికి చెందిన జడ్పీ వైస్ చైర్పర్సన్ కళ్లెపు శోభ రఘుపతిరావు దంపతులు, గ్రామ సర్పంచ్ ఉడుత లక్ష్మీఐలయ్య యాదవ్ దంపతులు గండ్ర రమణారెడ్డి, జ్యోతిలకు బొట్టుపెట్టి కొత్త వస్ర్తాలు బహూకరించారు.