హైదరాబాద్, మే7 (నమస్తే తెలంగాణ): సీఎంవో ఆదేశాలతో విక్టోరియా మెమోరియల్ హోం రెసిడెన్షియల్ స్కూల్ సూపరింటెండెంట్పై ఉన్నతాధికారులు విచారణ చేపట్టారు. సోషల్వెల్ఫేర్ డిపార్ట్మెంట్ ఏడీ ఉమాదేవి, జాయింట్ డైరెక్టర్ శ్రీనివాస్రెడ్డి, డీడీ, హోం హనరరీ సెక్రటరీ కిషన్ బృందం మంగళవారం ఉదయమే హోమ్కు చేరుకున్నది. సూపరింటెండెంట్ లక్ష్మీపార్వతి, పూర్వ స్టోర్కీపర్, ప్రిన్సిపాల్, ఇతర సిబ్బందిని అధికారుల బృందం విచారించింది. అనుమతుల్లేకుండా విదేశాలకు వెళ్లడం, విద్యార్హతలు తదితర అంశాలపై లోతుగా విచారించినట్లు సమాచారం.
రాజమండ్రి వెళ్తున్నట్లుగా లీవ్ తీసుకున్న తేదీల్లో దుబాయ్ వెళ్లినట్టుగా అధికారులు గుర్తించినట్లు తెలిసింది. సూపరింటెండెంట్ పాస్పోర్ట్, విద్యార్హతలు, ప్రమోషన్లకు సంబంధించిన పత్రాలన్నింటనీ వెంట తీసుకెళ్లినట్టు సమాచారం. హోమ్లోని లాకర్ను తెరిచి అందులో వస్తువులను పరిశీలించినట్లు తెలిసింది. రూమ్లో పలు వెండి ఆభరణలను గుర్తించినట్టు సమాచారం. మరో రెండు లాకర్లు ఉండగా, వాటి తాళాలు లేవని హోం సిబ్బంది బదులివ్వడంతో త్వరలోనే పోలీస్, రెవెన్యూ అధికారుల సమక్షంలో వాటిని తెరిచి పంచనామా నిర్వహించాలని నిర్ణయించినట్లు ఉన్నతాధికారులు వెల్లడించారు.