హైదరాబాద్, జూన్6 (నమస్తే తెలంగాణ): ములుగు జిల్లాలోని సమ్మక్కసాగర్ బరాజ్, దానికి ఎగువన, దిగువన ఉన్న నీటివినియోగ లెక్కలను అందజేయాలని నేషనల్ వాటర్ డెవలప్మెంట్ అథారిటీ (ఎన్డబ్ల్యూడీఏ) తెలంగాణ సర్కారుకు సూచించింది. ఈ మేరకు ఓ లేఖ రాసింది. గోదావరి, కావేరి నదుల అనుసంధానం ప్రాజెక్టును ఇచ్చంపల్లి నుంచి చేపట్టాలని ఇటీవల ఎన్డబ్ల్యూడీఏ ప్రతిపాదించింది. అయితే దానిపై తెలంగాణ అభ్యంతరం వ్యక్తం చేస్తూ కేంద్రానికి లేఖ రాసింది. ఇచ్చంపల్లి వద్ద బరాజ్ను నిర్మిస్తే దానికి దిగువ ఉన్న సమ్మక్కసాగర్ బరాజ్పై తీవ్ర ప్రభావం పడుతుందని, లోయర్ గోదావరిలో తెలంగాణ తన నీటివాటాను వినియోగించడంలో సమస్యలు తలెత్తుతాయని ఎన్డబ్ల్యూడీఏకు తెలంగాణ వెల్లడించింది. తాజాగా ఈ లేఖపైనే ఎన్డబ్ల్యూడీఏ స్పందించింది.