హైదరాబాద్, జూన్ 22 (నమస్తే తెలంగాణ): హైదరాబాద్తో పాటు అన్ని నగరాల్లో పార్కింగ్ సమస్యను పరిష్కరించడానికి కృత్రిమ మేధను ఎలా ఉపయోగించుకోవాలన్న దానిపై ప్రణాళికలు సిద్ధం చేయాలని ఐటీ మంత్రి శ్రీధర్బాబు సూచించారు. శనివారం సచివాలయంలోని తన చాంబర్లో ‘ఈజీ పార్క్ ఏఐ’ సంస్థ డిజిటల్ ప్రెజెంటేషన్ను మంత్రి తిలకించారు.
ఈ సందర్భంగా ఆయన మాట్లాడుతూ.. ‘పార్కింగ్ కోసం ప్రపంచవ్యాప్తంగా అభివృద్ధి చెందిన దేశాలు ఆర్టిఫీషియల్ ఇంటెలిజెన్స్ను విస్తృతంగా వినియోగిస్తున్నాయి. మనం కూడా ఆ దిశగా కృషి చేద్దాం. ఒక్క హైదరాబాద్లోనే దాదాపు 14 లక్షల ఫోర్ వీలర్లు, 70 వేల క్యాబ్లు, దాదాపు లక్ష ఆటోలు ఉన్నాయి. కాబట్టి కృత్రిమ మేధ ద్వారా రద్దీ ప్రాంతాలను గుర్తించడం, పార్కింగ్ కోసం దీన్ని వినియోగించుకోవడంపై దృష్టిసారించాలి. అవసరమున్న చోట మల్టీ లెవెల్ పార్కింగ్ వ్యవస్థను ఏర్పాటు చేసుకోవాలి. పార్కింగ్ స్లాట్ను ముందే బుక్ చేసుకునేందుకు యాప్లను రూపొందించాలి’ అని పేర్కొన్నారు.