హైదరాబాద్, జూలై 25 (నమస్తే తెలంగాణ): సిద్దిపేట జిల్లా కోహెడ మండలం గుండారెడ్డి పల్లెలోని మత్తడి పోషమ్మ గుడి దగ్గర నిజాం కాలం నాటి శాసనాన్ని కొత్త తెలంగాణ చరిత్ర బృందం పరిశోధక సభ్యులు అహోబిలం కరుణాకర్, మహమ్మద్ నసీరుద్దీన్ తాజాగా గుర్తించారు. ఈ శాసనం 19వ శతాబ్దపు తెలుగు లిపిలో ఉన్నది.
ఇందులో అప్పటి పాలనా భాష పార్సీ పదాలు ఉండటం విశేషం. 16 పంక్తుల ఈ చిన్న శాసనం నిజాం పరిపాలకులు నీటి పారుదల వ్యవస్థ పట్ల చూపిన శ్రద్ధ, బాధ్యతలను వివరించింది. ప్రభుత్వాధికారి బహాజోయి హకుందెన్ సాహెబ్ బహదూర్ జమావం(ద) కొండలరావు గుండారెడ్డిపల్లె చెరువు మత్తడికిచ్చిన ఆయలు(ఆదాయం) హిజ్రీ సం.1246 నుంచి 1250 వరకు చెల్లిన విషయం ఈ శాసనంలో పేర్కొన్నారు.