Nirmal | నిర్మల్ చైన్గేట్, జనవరి 30: ‘వైద్యో నారాయణో హరీ’ అన్నారు పెద్దలు. ఈ పదం నిర్మల్ ప్రభుత్వ వైద్యులకు అతికినట్టు సరిపోతున్నది. గొడ్డలి దాడిలో పేగులు బయటపడిన వ్యక్తి దవాఖానకు రాగా.. నిర్మల్ ప్రభుత్వ దవాఖాన వైద్యులు హైదరాబాద్కు పంపించకుండా స్థానికంగానే అతనికి మెరుగైన వైద్యం అందించి పునర్జన్మను ప్రసాదించారు. పూర్తిగా కోలుకున్న ఆ వ్యక్తిని వైద్యులు మంగళవారం డిశ్చార్జి చేశారు. ఈ మేరకు నిర్మల్ ప్రభుత్వ దవాఖాన సూపరింటెండెంట్ సునీల్ మీడియా సమావేశంలో వివరాలు వెల్లడించారు.
ఈ నెల 12న ఆదిలాబాద్కు చెందిన వెంకటేశ్ నిర్మల్ పట్టణంలోని మహాలక్ష్మి గుడి వద్ద గొడ్డలి దాడికి గురయ్యాడు. ఈ దాడిలో అతని కడుపులోని పేగులు బయటపడ్డాయి. బాధితుడిని చికిత్స నిమిత్తం నిర్మల్ దవాఖానకు తీసుకొచ్చారు. ప్రాణాపాయ స్థితిలో దవాఖానకు వచ్చిన వెంకటేశ్ను హైదరాబాద్కు తరలించాల్సి ఉన్నా.. ఇక్కడి వైద్యులు అతడిని నిర్మల్ దవాఖానలోనే అడ్మిట్ చేసుకుని మెరుగైన చికిత్స అందించారు. అతడి ప్రాణాలను కాపాడారు.
ప్రస్తుతం వెంకటేశ్ పూర్తిగా కోలుకోగా మంగళవారం డిశ్చార్జి చేశారు. ప్రాణాపాయ స్థితిలో ఉన్న వ్యక్తికి చికిత్స చేసి పునర్జన్మ ప్రసాదించిన వైద్యులను సూపరింటెండెంట్ అభినందించారు. ఈ సమావేశంలో వైద్యులు గణేశ్, రమ్య, పల్లవి, ఓటీ అసిస్టెంట్లు మనోహర్, షాహెదా, ముఖేశ్ పాల్గొన్నారు. అలాగే స్థానికంగానూ వైద్యులకు అభినందనలు వెల్లువెత్తుతున్నాయి.