హసన్పర్తి, నవంబర్ 15 : దీపావళిని పురస్కరించుకొని హనుమకొండ జిల్లా హసన్పర్తి మండలం సీతంపేటలో నేతకాని కులస్థులు మూడు రోజులపాటు నిర్వహించిన బతుకమ్మ వేడుకలు బుధవారం ముగిశాయి. పెద్ద ఎత్తున బతుకమ్మలను పేర్చి పురుషులు, మహిళలు పాటలు పాడుతూ కోలాటం ఆడుతూ ఊరేగింపుగా వచ్చారు. ఒక దగ్గర బతుకమ్మలు పెట్టి ఆడిపాడి సందడి చేశారు. అనంతరం బతుకమ్మను చెరువులో నిమజ్జనం చేశారు. వర్ధన్నపేట బీఆర్ఎస్ ఎమ్మెల్యే అభ్యర్థి అరూరి రమేశ్ హాజరై మహిళలతో కలిసి బతుకమ్మ ఆడారు. వేడుకలను తిలకించడానికి చుట్టు పక్కల గ్రామాలతోపాటు, వివిధ రాష్ర్టాల ప్రజలు సీతంపేటకు వచ్చారు.