హైదరాబాద్, జూన్ 29(నమస్తే తెలంగాణ): నవరత్న ప్రభుత్వరంగ సంస్థ అయిన జాతీయ ఖనిజాభివృద్ధి సంస్థ(ఎన్ఎండీసీ) కాంట్రాక్టు పద్ధతితో ఉద్యోగాల భర్తీకి నోటిఫికేషన్ జారీచేసింది. సివిల్-9, మెకానికల్-5, పర్సనల్-21, ఎలక్ట్రికల్-3, మెటీరియల్ మేనేజ్మెంట్-1, సర్వే-2, కంప్యూటర్ అండ్ ఇన్ఫర్మేషన్ టెక్నాలజీ-4, సేఫ్టీ-8, ప్రాజెక్ట్ మానిటరింగ్ సెల్-13, లా-11, ఎన్విరాన్మెంట్-2, కార్పొరేట్ సొషల్ రెస్పాన్స్బులిటీ -2 పోస్టులు భర్తీ చేయనున్నట్టు చెప్పింది. గ్రాడ్యుయేషన్ లేక డిప్లొమా కలిగి, గరిష్ట వయసు 45 ఏండ్లకు మించకుండా ఉండాలని స్పష్టంచేసింది. ఆన్లైన్లో దరఖాస్తు చేసుకోవాలని, వివరాలకు వెబ్సైట్ను సంప్రదించవచ్చని సూచించింది.
4 నుంచి ‘వెటర్నరీ’ సర్టిఫికెట్ల వెరిఫికేషన్
హైదరాబాద్, జూన్ 29 (నమస్తే తెలంగాణ): అనిమల్ హస్బెండ్రి (పశువైద్య, పశుసంవర్ధకశాఖలో) డిపార్టుమెంట్లో వెటర్నరీ అసిస్టెంట్ సర్జన్(వీఏఎస్) పోస్టులకు ఎంపికైన అభ్యర్థులకు జూలై 4 నుంచి 8వరకు సర్టిఫికెట్ల వెరిఫికేషన్ నిర్వహించనున్నారు. టీజీపీఎస్సీ అధికారులు శనివారం వెబ్నోట్తో పాటు షెడ్యూల్ను విడుదల చేశారు. నాంపల్లిలోని టీజీపీఎస్సీ కేంద్ర కార్యాలయంలో ఉదయం 10.30 నుంచి వెరిఫికేషన్ నిర్వహిస్తామని తెలిపారు. ఆప్షన్ల కోసం 3 నుంచి వెబ్సైట్ లింకు అందుబాటులో ఉంటుందని పేర్కొన్నారు.
రిక్రూట్మెంట్ బోర్డుపై ముందుకా? వెనక్కా?
హైదరాబాద్, జూన్ 29 (నమస్తే తెలంగాణ): విశ్వవిద్యాలయాల్లో ఆచార్యుల నియామకాలకు ఉద్దేశించిన తెలంగాణ యూనివర్సిటీస్ కామన్ రిక్రూట్మెంట్ బోర్డు -2022 బిల్లుపై రాష్ట్ర ప్రభుత్వం ఎటూ తేల్చుకోలేకపోతుంది. మొదట్లో కాస్త హడావిడి చేసిన ప్రస్తుతానికి ఈ అంశంపై సైలెంట్ అయ్యింది. రాష్ట్రంలోని విశ్వవిద్యాలయాల రిక్రూట్మెంట్లో పారదర్శకత, జవాబుదారీతనాన్ని తీసుకురావడంలో భాగంగా గత బీఆర్ఎస్ సర్కారు ఈ బిల్లును తీసుకొచ్చింది. అసెంబ్లీ ఆమోదించగా, అనంతరం ఆమోదం కోసం రాజ్భవన్కు పంపించారు. గవర్నర్ ఈ బిల్లుపై పలు అంశాలను ప్రస్తావిస్తూ నిరుడు రాష్ట్రపతి పరిశీలనకు పంపించారు. ఇంకా రాష్ట్రపతి పరిశీలనలోనే ఉంది. ఢిల్లీ నుంచి ఎలాంటి ముందడుగు పడకపోవడంతో ఏం చేయాలన్నది ప్రభుత్వం తేల్చుకోలేకపోతున్నది.