హైదరాబాద్, సిటీబ్యూరో, జూన్ 21 ( నమస్తే తెలంగాణ ): ఫొటో జర్నలిస్టు రాజేశ్ కుటుంబానికి నమస్తే తెలంగాణ దినపత్రిక అండగా నిలిచింది. సుదీర్ఘకాలంగా సంస్థలో పనిచేసిన రాజేశ్ ఫిబ్రవరిలో గుండెపోటుతో మరణించారు. ఆ కుటుంబానికి తోడ్పాటును అందించేందుకు నమస్తే తెలంగాణ ఉద్యోగులు, యాజమాన్యం కలిసి సుమారు రూ.10 లక్షలు పోగుచేశారు. ఇందుకు సంబంధించిన చెక్కులను శుక్రవారం హైదరాబాద్లోని పత్రిక ప్రధాన కార్యాలయంలో నమస్తే తెలంగాణ ఎడిటర్ తిగుళ్ల కృష్ణమూర్తి, తెలంగాణ టుడే దినపత్రిక ఎడిటర్ శ్రీనివాస్రెడ్డి, సంస్థ వైస్ ప్రెసిడెంట్ చిరంజీవి, చీఫ్ ఫొటోగ్రాఫర్ గంగాధర్, సీనియర్ ఫొటోగ్రాఫర్ రజినీకాంత్ కలిసి రాజేశ్ కుటుంబసభ్యులకు అందజేశారు. ఈ సందర్భంగా రాజేశ్ సతీమణి లావణ్య మాట్లాడుతూ.. పెద్ద దిక్కును కోల్పోయి కష్టాల్లో ఉన్న తమకు నమస్తే తెలంగాణ అండగా నిలవడం ధైర్యాన్నిచ్చిందని తెలిపారు. కుటుంబాన్ని ఆర్థికంగా ఆదుకున్న సంస్థకు జీవితాంతం రుణపడి ఉంటామని చెప్పారు. రాజేశ్ కుమార్తె శివాని 9వ తరగతి, చదువుతుండగా, బాబు వర్షిత్ 7వ తరగతి చదువుతున్నారు. కాగా, తెలంగాణ ఉద్యమకాలంలో అమరుడు సిరిపురం యాదయ్య ఆత్మబలిదానం చేస్తుండగా రాజేశ్ తీసిన ఫొటో ఎందరినో కదిలించింది.