హైదరాబాద్ సిటీబ్యూరో/ఖైరతాబాద్, నవంబర్ 11(నమస్తే తెలంగాణ): కాంగ్రెస్లో ఉన్నది కార్పొరేట్లు, బ్రోకర్లేనని ఆ పార్టీ మునుగోడు ఇంచార్జి పాల్వాయి స్రవంతి ఆరోపించారు. పార్టీలో నాటి విలువలు, విధానాలు లేవని విమర్శించారు. ఓడిన వ్యక్తికి టికెట్ ఇచ్చి తనను అమానించారని ఆవేదన వ్యక్తం చేశా రు. సోమాజీగూడ ప్రెస్క్లబ్లో శనివారం ఆమె మాట్లాడుతూ ఈ వ్యాఖ్యలు చేశారు. పార్టీని వీడి వెళ్లిపోయిన రాజగోపాల్రెడ్డిని తిరిగి చేర్చుకుని 24 గంటల్లో టికెట్ ఇచ్చారని పేర్కొన్నారు.
మునుగోడు ఇంచార్జిగా ఉన్న తనకు మాత్రం ఈ విషయంలో సమాచారం ఇవ్వలేదని ఆగ్రహం వ్యక్తంచేశారు. తనతండ్రి పాల్వా యి గోవర్ధన్రెడ్డి పార్టీకి చేసిన సేవలను అవమానించారని ఆవేదన వ్యక్తంచేశారు. పీసీసీ హోదాలో ఉన్న వ్యక్తి స్వయంగా పార్టీ విధానాలను తుంగలో తొక్కారని మండిపడ్డారు. ప్రస్తుతం పార్టీలో మహిళలు, సీనియర్లకు స్థానం లేకుండా చేశారని ఆరోపించారు. టికెట్లు అమ్ముకునే స్థాయికి పార్టీ దిగజారిందన్నారు. పార్టీని ఫిరాయించిన వారికే కిరీటాలు పెడుతున్నారని, పార్టీ చనిపోయిందన్న వారికే కండువాలు కప్పుతున్నారని విమర్శించారు. పార్టీ తనను గుర్తిస్తుందని పది రోజులు చూశానని, అయినా ఫలితం లేకపోవడంతో పార్టీని వీడుతున్నట్టు తెలిపారు. రాజీనామా లేఖను సోనియాగాంధీకి పంపినట్టు పేర్కొన్నారు. బీఆర్ఎస్ ఒక్కటే సంక్షేమ పథకాలతో ప్రజలను ఆదుకుంటున్నదని ప్రశంసించారు. అనుచరులు, కార్యకర్తల సలహా మేరకు నిర్ణయం తీసుకుంటానని స్రవంతి తెలిపారు.