హైదరాబాద్, జూలై 26 (నమస్తే తెలంగాణ): రాష్ట్రంలో వెంటనే కులగణన చేపట్టాలని జాతీయ బీసీ సంక్షేమ సంఘం అధ్యక్షుడు, రాజ్యసభ సభ్యుడు కృష్ణయ్య డిమాండ్ చేశారు. పంచాయతీరాజ్ ఎన్నికలపై సీఎం ప్రత్యేకంగా సమీక్షించిన నేపథ్యంలో కృష్ణయ్య స్పందించారు.
ఈ మేరకు ముఖ్యమంత్రికి శుక్రవారం బహిరంగ లేఖ రాశారు. బీసీ రిజర్వేషన్లను 42శాతానికి పెంచాలని, ఆ తర్వాతే సానిక సంస్థల ఎన్నికలు నిర్వహించాలని డిమాండ్ చేశారు. స్థానిక సంస్థల ఎన్నికల్లో బీసీ రిజర్వేషన్లు పెంచకుండా ఉండేందుకు ప్రభుత్వం సాకులు వెతుకుతున్నదని నిప్పులు చెరిగారు. కాంగ్రెస్ పార్టీ ఎన్నికల మ్యానిఫెస్టోలో ఇచ్చిన హామీని అమలు చేయాలని డిమాండ్ చేశారు.
లోక్సభలో బీసీ రిజర్వేషన్లు పెంచుతూ ప్రైవేట్ బిల్లు పెడితే దాదాపు అన్నిపార్టీల మద్దతు లభిస్తుందని, అందుకు కాంగ్రెస్ పార్టీ అగ్ర నాయకుడు రాహుల్గాంధీ చొరవ తీసుకోవాలని కోరారు. ఎన్నికల హామీలను అమలు చేయకుండా స్థానిక ఎన్నికలను నిర్వహిస్తే, రాష్ట్రవ్యాప్తంగా ఉద్యమాలు చేపడుతామని హెచ్చరించారు.