హైదరాబాద్, మే 27 (నమస్తే తెలంగాణ): మరో ఐదు రోజుల్లో నైరుతి రుతుపవనాలు కేరళ రాష్ర్టాన్ని తాకే అవకాశం ఉన్నదని భారత వాతావరణ కేంద్రం వెల్లడించింది. రుతుపవనాలు వేగంగా కదులుతున్నాయని తెలిపింది. ఈ ప్రభావంతో పగటి ఉష్ణోగ్రతలు తగ్గడంతోపాటు వివిధ రాష్ట్రాల్లో వర్షాలు కురిసే అవకాశం ఉన్నదని అధికారులు తెలిపారు. మూడురోజుల అనంతరం కొంత ఉపశమనం లభించనుందని వాతావరణ శాఖ తెలిపింది. ఈ నెల 31 వరకు రాష్ట్రంలో పొడి వాతావరణం ఉంటుందని, దీని కారణంగా ఎండల ప్రభావం ఉంటుందని వాతావరణ శాఖ తెలిపింది. మధ్య బంగాళాఖాతంలో ఏర్పడిన అల్పపీడనం, వాయుగుండంగా మారి తీవ్ర తుఫానుగా మారింది. ఆదివారం సాగర్ ఐలాండ్ వద్ద ఈ తుఫాను తీరం దాటింది. దీని ప్రభావంతో దక్షిణ తెలంగాణలో వర్షాలు పడనున్నట్టు హైదరాబాద్ వాతావరణ కేంద్రం తెలిపింది. మంగళ, బుధవారాల్లో రాష్ట్రంలో పొడి వాతావరణం ఏర్పడే అవకాశం ఉన్నదని తెలిపింది. ఆదివారం రెమాల్ తుఫాన్ రాష్ట్రంలో బీభత్సమే సృష్టించింది. వేర్వేరు ఘటనల్లో 14 మంది చనిపోయారు. ముఖ్యంగా పలు ప్రాంతాల్లో బలమైన గాలులు వీచాయి. దీంతో పలుచోట్ల ఇండ్ల పైకప్పులు ఎగిరిపోయాయి. భారీ వృక్షాలు నేలకొరిగాయి. విద్యుత్తు స్తంభాలు నేలకొరిగాయి.