హనుమకొండ చౌరస్తా, ఫిబ్రవరి 9: చరిత్రలో ఎన్నడూలేని విధంగా 39 స్థానాల్లో గెలిచి బలమైన ప్రతిపక్షంగా బీఆర్ఎస్ పార్టీ నిలిచిందని ఎమ్మెల్సీ, కవి, గాయకుడు దేశపతి శ్రీనివాస్ అన్నారు. కాంగ్రెస్ రావడం అంటే.. కష్టాలు రావడమని ప్రజలకు ఇప్పుడే తెలుస్తున్నదని ఆయన పేర్కొన్నారు. హనుమకొండలోని బీఆర్ఎస్ పార్టీ కార్యాలయంలో నిర్వహించిన వరంగల్ పశ్చిమ నియోజకవర్గ పార్టీ కార్యకర్తల విస్తృతస్థాయి సమావేశంలో దేశపతి శ్రీనివాస్ మాట్లాడారు. సోనియాగాంధీ దయతో తెలంగాణ ఇచ్చింది అని గవర్నర్ అనడం సరైంది కాదని, తెలంగాణ ఎవరి దయతో వచ్చింది కాదని ఆయన పేర్కొన్నారు. ఉద్యమ నేత కేసీఆర్కు చాలా చిన్న చాంబర్ విడివిడిగా రెండు రూంలు కేటాయించడంపై అభ్యంతరం తెలిపారు. ఇది కాంగ్రెస్ సంస్కారానికి నిదర్శనమని విమర్శించారు.
ఓయూ విద్యార్థులను అరెస్టు చేయడం.. అసెంబ్లీ ముందు ఇనుప కంచెలు విస్తరించడం, వ్యవసాయ యూనివర్సిటీ భూముల విషయంలో విద్యార్థుల జుట్టు పట్టిలాగడం, ఇది కాంగ్రెస్ ప్రజాపాలన శాంపిల్ మాత్రమేనని అన్నారు. రాబోయే రోజుల్లో విశ్వరూపం చూపిస్తారని, మరో పోరాటానికి సమయం ఆసన్నమైందని చెప్పారు. బీఆర్ఎస్ ఫీనిక్స్ పక్షిలాంటిదని, తిరిగి కొత్త ఆలోచనలు, రెట్టింపు శక్తితో మళ్లీ వస్తుందని తెలిపారు. ఢిల్లీకి వెళ్లిన ముఖ్యమంత్రి రేవంత్రెడ్డి.. మోదీతో మాట్లాడి ఇద్దరం కలిసి పనిచేద్దామని, బీఆర్ఎస్ లేకుండా చేయడమే పనిగా పెట్టుకున్నట్టు విమర్శించారు. తెలంగాణలో కాంగ్రెస్ జెండాల కంటే తెలుగుదేశం పార్టీ జెండాలే ఎక్కువగా ఉన్నాయని, కొమ్మలు, రెమ్మలు తెలంగాణలో ఉన్నా వేర్లు మాత్రం ఆంధ్రాలో ఉన్నాయని ఎద్దేవా చేశారు. దివంగత మాజీ ప్రధాని పీవీ నరసింహారావుకు భారతరత్న ప్రకటించడం అభినందనీయమని అన్నారు.
కాంగ్రెస్ నాయకులు కక్ష సాధింపు చర్యలు.. తప్పుడు కేసులు బనాయించడం మానుకోవాలని మాజీ ఎమ్మెల్యే, బీఆర్ఎస్ జిల్లా అధ్యక్షుడు దాస్యం వినయ్భాస్కర్ సూచించారు. తమ నాయకులు, కార్యకర్తలను వేధిస్తే ఊరుకునేది లేదని హెచ్చరించారు. సమావేశంలో కుడా మాజీ చైర్మన్లు మర్రి యాదవరెడ్డి, సుందర్రాజ్ యాదవ్, కార్పొరేటర్లు బొంగు అశోక్యాదవ్, చెన్నం మధు, మాజీ కార్పొరేటర్లు పాల్గొన్నారు.