హైదరాబాద్, జూలై 16 (నమస్తే తెలంగాణ): విద్యుత్తు విచారణ కమిషన్ చైర్మన్పై సుప్రీంకోర్టు ప్రధాన న్యాయమూర్తి జస్టిస్ చంద్రచూడ్ చేసిన వ్యాఖ్యలు ముఖ్యమంత్రి రేవంత్రెడ్డికి చెంపపెట్టు లాంటివని బీఆర్ఎస్ నేత, మాజీ మంత్రి వేముల ప్రశాంత్రెడ్డి పేర్కొన్నారు. మాజీ ముఖ్యమంత్రి కేసీఆర్పై, బీఆర్ఎస్పై కక్ష సాధింపుతో ప్రభుత్వం బురద జల్లుతున్నదనడానికి సుప్రీంకోర్టు ఇచ్చిన ఆదేశాలు నిదర్శనమని చెప్పారు.
సుప్రీంకోర్టు వ్యాఖ్యలు తమ వాదనకు బలం చేకూర్చేవిగా ఉన్నాయని, చివరకు గెలిచేది న్యాయం, ధర్మమేనని స్పష్టంచేశారు. కేసీఆర్ ప్రభుత్వం మీద బురద జల్లే పద్ధతి మంచిది కాదనే విషయాన్ని రేవంత్ సర్కార్ గ్రహించాలని హితవు పలికారు. మంగళవారం ఆయన అసెంబ్లీ మీడియాలో పాయింట్ వద్ద మాట్లాడుతూ.. తమకు న్యాయవ్యవస్థపై పూర్తి నమ్మకం ఉన్నదని, విద్యుత్తు కమిషన్పై సుప్రీంకోర్టు తీర్పును స్వాగతిస్తున్నామని చెప్పారు.
ప్రభుత్వాల మధ్య కుదిరిన విద్యుత్తు ఒప్పందాలపై న్యాయ విచారణకు ఆదేశించడం అంటేనే దురుద్దేశపూరిత చర్య అని విమర్శించారు. కరెంటు ఇచ్చి తెలంగాణ రైతులను, పరిశ్రమలను కాపాడింది కేసీఆరేనని చెప్పారు. కేసీఆర్ మూడున్నరేండ్లలోనే అన్నిరంగాలకు 24 గంటల కరెంటు ఇచ్చారని, తద్వారా పెద్ద సంఖ్యలో ఉద్యోగ, ఉపాధి అవకాశాలు లభించాయని, ఐటీ రంగం అభివృద్ధి సాధించిందని వివరించారు.
దేశంలోనే 24 గంటలకు కరెంటు ఇచ్చిన రాష్ట్రంగా తెలంగాణకు, కేసీఆర్కు మంచి పేరు వచ్చిందని గుర్తుచేశారు. ఆ మంచి పేరును తుడిచేయాలన్న కుట్రతోనే రేవంత్రెడ్డి విద్యుత్తుపై కమిషన్ వేశారని మండిపడ్డారు. కమిషన్ చైర్మన్ జస్టిస్ నర్సింహారెడ్డి ఎలాంటి విచారణ జరుపకుండానే ప్రెస్మీట్లు పెట్టి ఏకపక్షంగా కేసీఆర్పై ఆరోపణలు చేశారని ఆరోపించారు.మిషన్ కాకతీయ, మిషన్ భగీరథ, కాళేశ్వరం వంటి మంచి పనుల మీద బురద జల్లే కుట్ర జరుగుతున్నదని మండిపడ్డారు. అందులో భాగంగానే రేవంత్ సర్కార్ సీరియల్ స్క్రిప్టు రచించిందని, దీనికి ఆదిలోనే సుప్రీంకోర్టు రూపంలో దెబ్బపడిందని చెప్పారు.
రేవంత్వి డైవర్షన్ పాలిటిక్స్
ప్రజలకు కాంగ్రెస్ ప్రభుత్వం ఇచ్చిన హామీలు నెరవేర్చకుండా వాటిపై దృష్టిని మళ్లించేందుకు డైవర్షన్ పాలిటిక్స్ను రేవంత్రెడ్డి అమలుచేస్తున్నారని ప్రశాంత్రెడ్డి మండిపడ్డారు. ఇప్పటికైనా దుర్బుద్ధి ఆలోచనలు మానుకొని, ఇచ్చిన హామీలపై దృష్టిపెట్టాలని సూచించారు. కాంగ్రెస్ మోసాలను ప్రజలు గమనిస్తున్నారని, తగిన గుణపాఠం చెప్తారని హెచ్చరించారు. ఎలాంటి కండీషన్లు లేకుండా రూ.2 లక్ష రుణమాఫీని అమలుచేయాలని డిమాండ్చేశారు. కేసీఆర్కు ఉన్న మంచిపేరును తుడిపేయాలన్నదే రేవంత్ యావగా కనిపిస్తున్నదని పేర్కొన్నారు. కేసీఆర్ మంచి పనులపై బురద జల్లితే ఇలాంటి ఎదురుదెబ్బలే తగులుతాయని చెప్పారు.