ములుగు, జూలై 17: కాంగ్రెస్ ప్రభుత్వం ఏర్పడ్డాక రాష్ట్రంలో నిరుపేద రైతులపై దాడులు, దౌర్జన్యాలు విపరీతంగా పెరిగిపోయాయని మాజీ మంత్రి, సిద్దిపేట ఎమ్మెల్యే తన్నీరు హరీశ్రావు ఆరోపించారు. కొంతమంది కాంగ్రెస్ నాయకుల అండదండలతో భూకబ్జాదారులు అధికారులను లొంగదీసుకొని ఇష్టారీతిన వ్యవహరిస్తూ రైతులను చిత్రహింసలకు గురిచేస్తున్నారని పేర్కొన్నారు. భూవివాదంలో ఆత్మహత్యకు యత్నించిన సిద్దిపేట జిల్లా కొండపాక మండలం దమ్మక్కపల్లి గ్రామానికి చెందిన బండి కిష్టయ్యను హరీశ్రావు బుధవారం పరామర్శించారు. ములుగు మండలం లక్ష్మక్కపల్లిలోని ఆర్వీఎం దవాఖానలో ఆయన చికిత్స పొందుతున్నాడు. ఈ సందర్భంగా హరీశ్రావు మాట్లాడుతూ.. బాధిత రైతుకు న్యాయం జరిగే వరకు అండగా ఉంటామని భరోసానిచ్చారు.
బండి కిష్టయ్య తన భూమికి హద్దులు చూపించాలని సర్వేయర్కు దరఖాస్తు చేసుకోగా, సర్వేకు వచ్చిన డీఐ మొదట సరిహద్దులు చూపి తరువాత కాంగ్రెస్ నేతల సూచనలతో సరిహద్దులు మార్చి తన పొలానికి దారి లేకుండా ఇబ్బందులకు గురి చేసి రూ. 20 లక్షలు డిమాండ్ చేశారని ఆరోపించారు. తమకు కాంగ్రెస్ నేతల అండదండలు ఉన్నాయని, మమ్మల్ని ఎవరూ ఏమి చేయలేరని, మీరు ఎక్కడికి వెళ్లినా న్యాయం జరగదని బెదిరించి అన్యాయంగా పోలీస్ కేసు నమోదు చేసి ఇబ్బందులకు గురిచేశారని, బాధితుడి భార్య చెప్పిందని హరీశ్రావు తెలిపారు. రాష్ట్రంలో అనేక చోట్ల కాంగ్రెస్ నేతల అండదండలతో అనేక దౌర్జన్యాలకు పాల్పడి నిరుపేద రైతులకు అన్యాయం చేస్తున్నారని ఆవేదన వ్యక్తం చేశారు. ఇలాంటి సంఘటనలు రాష్ట్రంలో పునరావృతం కాకుండా చర్యలు తీసుకోవాలని ప్రభుత్వానికి సూచించారు. అంతకుముందు జిల్లా కలెక్టర్ మనుచౌదరితో ఫోన్లో హరీశ్రావు మాట్లాడారు. వెంటనే విచారణ జరిపి బాధిత రైతుకు న్యాయం చేయాలని కోరారు.