హైదరాబాద్, జూన్ 26 (నమస్తే తెలంగాణ)/జూబ్లీహిల్స్: ఫ్లైయాష్ రవాణా స్కామ్లో తన నిజాయితీని నిరూపించుకొనే విషయంలో రవాణాశాఖ మంత్రి పొన్నం ప్రభాకర్ ఎందుకు పారిపోతున్నారని బీఆర్ఎస్ ఎమ్మెల్యే పాడి కౌశిక్రెడ్డి నిలదీశారు. నీతివంతుడిని అని చెప్పుకొనే పొన్నం ఫ్ల్లైయాష్ రవాణాలో అవినీతికి పాల్పడలేదని జూబ్లీహిల్స్ వేంకటేశ్వరస్వామి సాక్షిగా ప్రమాణం చేయడానికి ఎందుకు భయపడుతున్నారని ప్రశ్నించారు. ‘పొన్నం చేసిన సవాల్ను స్వీకరించి వీణవంకలోని నా నివాసంలో ఆంజనేయస్వామి చిత్రపటంతో ప్రమాణం చేసి నా నిజాయితీని నిరూపించుకున్న’ అని చెప్పారు. బుధవారం ఉదయం జూబ్లీహిల్స్ వేంకటేశ్వరస్వామిని దర్శించుకొన్న కౌశిక్రెడ్డి.. దేవాలయం బయట మీడియాతో మాట్లాడారు. ఫ్లైయాష్ రవాణాలో పొన్నం రూ.100 కోట్ల స్కామ్ చేశారని ఆరోపించానని, ఆయన అవినీతికి పాల్పడకపోతే వేంకటేశ్వరస్వామికి పరమభక్తుడైన పొన్నం శ్రీవారి సమక్షంలో ప్రమాణం చేయాలని ఆదివారం సవాల్ విసిరానని గుర్తుచేశారు.
చెప్పిన మాట ప్రకారం తాను బుధవారం ఉదయం 11 గంటలకు వేంకటేశ్వరస్వామి సన్నిధికి వచ్చానని, మంత్రి పొన్నం కోసం పావుగంటపాటు ఎదురుచూశానని చెప్పారు. కానీ, ఆయన రాలేదని పేర్కొన్నారు. ఆయన వచ్చి ప్రమాణం చేస్తే వెంటనే తాను బహిరంగ క్షమాపణలు చెప్పేందుకు సిద్ధమని తెలిపారు. పొన్నం ఆలయానికి రానందున ఫ్లైయాష్లో రూ.100 కోట్ల స్కామ్ చేశాడని రుజువైందని చెప్పారు. తాను కేవలం ఆరోపణలు చేయడం లేదని, స్కామ్కు సంబంధించిన పూర్తి ఆధారాలు ఉన్నాయని తెలిపారు. ఫ్లైయాష్ వేయింగ్ బిల్లులను ఈ సందర్భంగా ఆయన మీడియాకు చూపించారు. అధికలోడుతో ఫ్లైయాష్ రవాణా చేయడం వల్ల రోడ్లు దెబ్బతింటున్నాయని, ఫలితంగా ప్రమాదాల బారినపడి పలువురు చనిపోతున్నారని మండిపడ్డారు. ప్రజల శవాలపై పైసలు ఏరుకోవడానికి సిగ్గనిపించడం లేదా? అని పొన్నంను ఉద్దేశించి ఆగ్రహం వ్యక్తం చేశారు.
బ్లాక్బుక్లో మొదటిపేరు పొన్నం..
ఐదేండ్లలో తిరిగి బీఆర్ఎస్ అధికారంలోకి వస్తుందని, కేసీఆర్ ముఖ్యమంత్రి అవుతారని కౌశిక్రెడ్డి ధీమా వ్యక్తంచేశారు. ఇప్పుడు అవినీతి ఆరోపణలు ఎదుర్కొంటున్న మంత్రులు, ఎమ్మెల్యేలు, అధికారులు చేసే అవినీతిపై బ్లాక్బుక్ ఓపెన్ చేస్తున్నామని చెప్పారు. వేంకటేశ్వర దేవాలయం సాక్షిగా బ్లాక్బుక్లో మొదటి పేరు మంత్రి పొన్నం ప్రభాకర్ పేరు రాస్తున్నామని తెలిపారు. తాము అధికారంలోకి రాగానే పొన్నం చేసిన రూ.100 కోట్ల స్కామ్ను బయటపెడతామని చెప్పారు. ఈ సమావేశంలో యూసుఫ్గూడ కార్పొరేటర్ రాజ్కుమార్ పటేల్, మైనార్టీ నేత సొహైల్, పలువురు బీఆర్ఎస్ నాయకులు పాల్గొన్నారు.