హైదరాబాద్, జూన్ 23 (నమస్తే తెలంగాణ): ఎన్టీపీసీ ఫ్లైయాష్ రవాణాలో రవాణాశాఖ మంత్రి పొన్నం ప్రభాకర్ డబ్బులు తీసుకోకపోతే హైదరాబాద్ జూబ్లీహిల్స్లోని వేంకటేశ్వరస్వామి ఆలయంలో ప్రమాణానికి సిద్ధమా? అని బీఆర్ఎస్ నేత, హుజూరాబాద్ ఎమ్మెల్యే పాడి కౌశిక్రెడ్డి సవాల్ విసిరారు. ఈ నెల 26న ఉదయం 11 గంటలకు తాను ఆలయానికి వస్తానని, పొన్నం వచ్చి డబ్బులు తీసుకోలేదని ప్రమాణం చేస్తే తాను బహిరంగ క్షమాపణలు చెప్పి ముక్కునేలకు రాస్తానని తెలిపారు. ఒకవేళ ఆ రోజు పొన్నం.. ఆలయానికి రాకపోతే మరిన్ని నిజాలు బయటపెడతామని హెచ్చరించారు. హైదరాబాద్లోని తెలంగాణభవన్లో ఆదివారం ఆయన ఎమ్మెల్యే డాక్టర్ కల్వకుంట్ల సంజయ్కుమార్, పార్టీ నేత మన్నె గోవర్ధన్రెడ్డితో కలిసి మీడియాతో మాట్లాడారు. మంత్రి పొన్నం ప్రభాకర్ తిరుమల వేంకటేశ్వరస్వామి భక్తుడు కాబట్టి, తాను కూడా శ్రీవారి భక్తుడిని కాబట్టి ప్రమాణంపై సవాల్ విసురుతున్నట్టు చెప్పారు. ఫ్లైయాష్ రవాణా అంశంలో మంత్రి పొన్నం ప్రభాకర్.. లీగల్ నోటీసులు ఇవ్వటంపై మీడియా ప్రతినిధులు ప్రశ్నించగా ఇల్లీగల్ నోటీసులకు తమ లీగల్ టీమ్ సమాధానం చెప్తుందని పేర్కొన్నారు. అధిక లోడ్తో లారీలు నడపవచ్చా? రవాణా మంత్రిగా పొన్నం ప్రభాకర్ సమాధానం చెప్పాలి? అని నిలదీశారు. 34 టన్నులతో వెళ్లాల్సిన ఫ్లైయాష్ లారీలు 84 టన్నులు మోసుకెళ్తున్నాయని, నేటికీ ఓవర్ లోడ్తో రవాణా యథేచ్ఛగా సాగుతున్నదని తెలిపారు. మంత్రి పొన్నం ప్రమేయం లేకపోతే ఓవర్ లోడ్ లారీలపై చర్యలు ఎందుకు తీసుకోవటం లేదు? అని నిలదీశారు.
ఒకరిద్దరు వెళ్తే నష్టమేమీ లేదు
పార్టీలో పదవులు, అధికారం అనుభవించి నలుగురు వెళ్లిపోయినంత మాత్రాన బీఆర్ఎస్కు వచ్చే నష్టమేమీలేదని కౌశిక్రెడ్డి చెప్పారు. బీఆర్ఎస్కు 34 మంది ఎమ్మెల్యేలు, 28 మంది ఎమ్మెల్సీలు, నలుగురు రాజ్యసభ సభ్యులు, వందల్లో స్థానిక ప్రజాప్రతినిధులు, లక్షల్లో కార్యకర్తలు పార్టీకి సైన్యంగా ఉన్నారని చెప్పారు. కేవలం ఐదుగురు ఎమ్మెల్యేలు ఉన్న కాంగ్రెస్ అధికారంలోకి వచ్చినప్పుడు.. తెలంగాణ రాష్ర్టాన్ని సాధించిన కేసీఆర్, యువనేతలు కేటీఆర్, హరీశ్రావు, లక్షల్లో గులాబీ సైన్యం ఉన్న తమ పార్టీ తిరిగి కచ్చితంగా అధికారం చేపడుతుందని ధీమా వ్యక్తంచేశారు. పార్టీ మారిన ఎమ్మెల్యేలను విడిచిపెట్టబోమని, వారి లొసుగులన్నీ బయటపెడతామని హెచ్చరించారు. పార్టీ కంటే ఎవరూ పెద్ద కాదు అనే విషయం ప్రతి ఎమ్మెల్యే గుర్తు పెట్టుకోవాలి సూచించారు. ఇప్పుడు వెళ్లిన వారిని ఎట్టిపరిస్థితుల్లోనూ పార్టీలో చేర్చుబోమని స్పష్టంచేశారు.
6నెలల బకాయిలతోపాటు 9 నెలల పింఛన్లు ఇవ్వాలి
ఇంట్లో అవ్వ, తాతకు పింఛను పెంచుతామని చెప్పి అధికారంలోకి వచ్చిన రేవంత్రెడ్డి.. ఇప్పుడు మూడు నెలల పింఛన్లు ఇవ్వకుండా ఆపారని ఎమ్మెల్యే కౌశిక్రెడ్డి ధ్వజమెత్తారు. డిసెంబర్, ఏప్రిల్, మే నెలల పింఛన్ మొత్తాన్ని ఆపటం వల్ల పింఛన్లపై ఆధారపడిన వృద్ధులు, దివ్యాంగులు, వితంతులు ఎలా జీవనం సాగిస్తారని నిలదీశారు. డిసెంబర్ నుంచే పెంచుతామన్న పింఛన్ను అమలుచేసి ఆరునెలల బకాయిలతోపాటు మొత్తం 9 నెలల మొత్తం పింఛను చెల్లించాలని కోరుతూ సీఎం రేవంత్రెడ్డికి బహిరంగలేఖ రాసినట్టు చెప్పారు. కాంగ్రెస్ ఎన్నికల్లో ఇచ్చిన హామీ మేరకు కుటుంబంలో ఇద్దరికీ పింఛన్లు ఇవ్వాలని డిమాండ్ చేశారు. ఇచ్చిన హామీలు అమలయ్యేదాకా ప్రజల పక్షాన పోరాటాలు చేస్తూనే ఉంటామని స్పష్టంచేశారు.
అధికారులు ప్రొటోకాల్ పాటించటం లేదు
బీఆర్ఎస్ ఎమ్మెల్యేలు ఉన్న నియోజకవర్గాల్లో అధికారులు ప్రొటోకాల్ పాటించటం లేదని కౌశిక్రెడ్డి ఆరోపించారు. ప్రొటోకాల్ పాటించాలని తన నియోజకవర్గంలోని ఎమ్మార్వోలకు లేఖరాసినా మంత్రి హాజరవుతారని చెక్కుల పంపిణీ కార్యక్రమాన్ని ఆపుతున్నారని మండిపడ్డారు. ఈ నెల 27న కల్యాణలక్ష్మి చెకుల కాలపరిమితి ముగుస్తుందని వెల్లడించారు. కల్యాణలక్ష్మి చెక్కులతోపాటు తులం బంగారం ఇవ్వాలని ప్రజలు ఎక్కడ అడుగుతారోనని భయపడుతున్నారా? అని కాంగ్రెస్ సర్కారును నిలదీశారు. హుజూరాబాద్లో ఎమ్మెల్యేకు ఒక్క కల్యాణలక్ష్మి చెక్కు కూడా ఇవ్వొద్దని మంత్రి పొన్నం ప్రభాకర్.. ఆర్డీవో, ఎమ్మార్వోలకు హుకుం జారీచేశారని విమర్శించారు. ఇందుకు సంబంధించిన ఫోన్ రికార్డును మీడియాకు వినిపించారు. కాంగ్రెస్ ఎమ్మెల్యేలు ఉన్నచోట వారే చెకులను పంపిణీ చేస్తున్నారని తెలిపారు. అధికారులు నిబంధనల ప్రకారం చెకులు పంచకపోతే హైకోర్టుకు వెళ్తానని స్పష్టం చేశారు. నిబంధనలకు విరుద్ధంగా పనిచేస్తున్న అధికారుల పేర్లు బ్లాక్ బుక్లో రాస్తున్నానని, బీఆర్ఎస్ అధికారంలోకి వచ్చాక ఆ అధికారులకు బ్లాక్డేస్ ఉంటాయని హెచ్చరించారు.