హైదరాబాద్, జూలై 24(నమస్తే తెలంగాణ): కేంద్రంలోని ఎన్డీఏ ప్రభుత్వం తొలి నుంచీ తెలంగాణకు తీరని అన్యాయం చేస్తూనే ఉన్నదని ఎంఐఎం సభ్యుడు మాజిద్ హుస్సేన్ ధ్వజమెత్తారు. కేంద్ర బడ్జెట్లో తెలంగాణకు జరిగిన అన్యాయాన్ని నిరసిస్తూ ప్రభుత్వం ప్రవేశపెట్టిన తీర్మానంపై మాట్లాడారు.
తెలంగాణకు న్యాయంగా రావాల్సిన వాటా రావడం లేదని పేర్కొన్నారు. విభజన చట్టంలో ఇచ్చిన హామీలు కూడా అమలుకు నోచుకోవడంలేదని తెలిపారు. కోల్ బ్లాక్లను ప్రైవేటుపరం చేసి తెలంగాణకు ద్రోహం చేసిందని ధ్వజమెత్తారు.
రాష్ట్రంలోని కాంగ్రెస్ ప్రభుత్వం ఎన్నికల సందర్భంగా ఇచ్చిన ఆరు గ్యారెంటీలను అమలుచేయాలని కోరారు. విద్యుత్తు ప్రవేటీకరణకు తాము వ్యతిరేకమని, నిర్వహణ బాధ్యతలను అదానీ పవర్కు అప్పగించినట్టు వస్తున్న వార్తలపై ప్రభుత్వం స్పందించాలని డిమాండ్ చేశారు.