హైదరాబాద్ : బీజేపీ రాష్ట్ర అధ్యక్షుడు బండి సంజయ్ని సస్పెండ్ చేయాలని ఎమ్మెల్యే కేపీ వివేకానంద డిమాండ్ చేశారు. లేదంటే వ్యాఖ్యలపై ప్రభుత్వమే చట్టపరమైన చర్యలు తీసుకునేందుకు వెనుకాడబోదని స్పష్టం చేశారు. మంగళవారం టీఆర్ఎల్పీ కార్యాలయంలో ప్రభుత్వ విప్ ప్రభాకర్రావుతో కలిసి ఆయన మీడియాతో మాట్లాడారు. ఈ సందర్భంగా ఆయన బండి సంజయ్ వ్యాఖ్యలపై ధ్వజమెత్తారు. పిచ్చోడిచేతిలో రాయిలా బీజేపీని బండి సంజయ్ చేతిలో పెట్టారని ఆరోపించారు. ‘శవాలు దొరికితే మీవీ…శివాలు దొరికితే మావీ’ అని చేసిన వ్యాఖ్యలు బండి వ్యక్తిగతమా..? పార్టీ విధానమా? స్పష్టం చేయాలన్నారు.
బీజేపీ ఎంత సేపు మతం.. కులం అంటూ రాజకీయాలు చేసి ప్రజలను రెచ్చగొట్టడమే పనిగా పెట్టుకుందని ఆగ్రహం వ్యక్తం చేశారు. ప్రధాని మోదీ దగ్గరి నుంచి కేంద్రమంత్రులు, ఎంపీలు ఇలా అన్నిస్థాయిల్లో అబద్ధాలు ప్రచారం చేయడమే పనిగా పెట్టుకున్నారని ఆరోపించారు. రాష్ట్ర పథకాలను కాపీ కొట్టడమే కాకుండా.. ఆ పథకాలన్నీ తామే ప్రవేశపెట్టామని కేంద్రం నిస్సిగ్గుగా చెప్పుకుంటుందని విమర్శించారు. మిషన్ భగీరథ పథకాన్ని కాపీ కొట్టి జల్జీవన్ మిషన్ అని పేరుపెట్టుకున్నారని, ఆరోగ్యశ్రీ పథకాన్ని వైఎస్సార్ ప్రవేశపెట్టారని, ఆ స్ఫూర్తిని తాము కొనసాగిస్తామని కేసీఆర్ అసెంబ్లీ సాక్షిగా చెప్పిన విషయాన్ని గుర్తు చేశారు. అల్లూరి సీతారామరాజును సైతం తెలంగాణ కోసం కొట్లారంటూ అమిత్షా అసత్యాలు ప్రచారం చేయగలరని ఎద్దేవా చేశారు.
యూపీలో మంచిపనులు చేయటంతో యోగీ ప్రభుత్వం రెండుసార్లు అధికారంలోకి వచ్చిందని హైదరాబాద్ గడ్డ మీద చెప్పిన ప్రధాని మోదీకి సీఎం.. కేసీఆర్ అద్భుత పనితీరును తెలంగాణ ప్రజలు ఆశీర్వదించటంతో రెండుసార్లు అధికారాన్ని చేపట్టిన విషయాన్ని విస్మరించారన్నారు. కేంద్ర మంత్రి కిషన్రెడ్డి తనేం చేస్తున్నారో తనకే తెలియడం లేదని, అందుకే కన్ఫ్యూజన్రెడ్డిగా మారాడని ఆయన విమర్శించారు. కేంద్రమంత్రులు, ఎంపీలకు అసత్యాలు ఎలా మాట్లాడో శిక్షణ ఇచ్చిన మోదీ ఏకంగా జీహెచ్ఎంసీ కార్పొరేటర్లకు అవే పాఠాలు చెప్పేందుకు సిద్ధపడ్డారని ఎమ్మెల్యే ఆరోపించారు. జూబ్లీహిల్స్ ఘటనపై రాజకీయాలు చేయొద్దని సూచించారు. ఈ విషయంలో చట్టం తనపని తాను చేసుకుంటూ వెళ్తోందని, న్యాయవ్యవస్థపై అపారమైన నమ్మకం ఉన్న రఘునందన్రావు లాంటి వాళ్లు దీనిపై రాద్ధాంతం చేయడం సరికాదన్నారు.
ప్రభుత్వ విప్ ఎంఎస్ ప్రభాకర్ మాట్లాడుతూ.. హైదరాబాద్ నగర అభివృద్ధికి ఏమాత్రం సహకరించకుండా, రాష్ట్ర ప్రగతి కసం పాటుపడని కేంద్రమంత్రి కిషన్రెడ్డి తన పదవికి రాజీనామా చేయాలని డిమాండ్ చేశారు. బీజేపీ కార్పొరేటర్లతో మోదీ ఫోటోలకు ఫోజులు ఇచ్చి పంపకుండా హైదరాబాద్ అభివృద్ధికి కనీసం రూ. 2వేల కోట్లు ఇచ్చి పంపాలని ఆయన డిమాండ్ చేశారు. రూ.2వేల కోట్లు హైదరాబాద్కు బీజేపీ కార్పొరేటర్లు తెస్తే తాము ఎయిర్ పోర్టుకు వెళ్లి కార్పొరేటర్లకు పూలమాల వేసి స్వాగతం పలుకుతామని చెప్పారు. బీజేపీకి టీఆర్ఎస్ మీదే కాకుండా యావత్ తెలంగాణ ప్రజల మీదే కోపం ఉందని, అందుకే ఆ పార్టీ నేతలు రాష్ట్రంపై విషం చిమ్ముతున్నారని విమర్శించారు.