హైదరాబాద్, జూలై 14 (నమస్తే తెలంగాణ): బీడీలు అమ్ముకున్న దానం నాగేందర్.. ఇన్ని వేల కోట్లు ఎలా సంపాదించారని హుజూరాబాద్ ఎమ్మెల్యే పాడి కౌశిక్రెడ్డి ప్రశ్నించారు. దానం తన ఇంటి చుట్టూ, హైదరాబాద్లో చేసిన భూకబ్జాల బాగోతాలన్నీ బయటికి తీస్తామని హెచ్చరించారు. కబ్జాకోరు, చీటర్, రౌడీషీటర్ అయిన దానం నీతులు చెప్పడం తగదని హితవు పలికారు. బీఆర్ఎస్ వర్కింగ్ ప్రెసిడెంట్ కేటీఆర్ను విమర్శించే స్థాయా? అని నిలదీశారు.
ఆదివారం తెలంగాణభవన్లో కౌశిక్రెడ్డి మీడియాతో మాట్లాడుతూ.. స్థాయిమర్చి నోటికొచ్చినట్టు మాట్లాడొద్దని దానం నాగేందర్ను హెచ్చరించారు. 2018 జూన్ 22న బీఆర్ఎస్లో చేరినప్పుడు. ‘కాంగ్రెస్ అన్యాయం చేస్తున్నది.. కేసీఆర్ దయ వల్ల రెండుసార్లు ఎమ్మెల్యేగా గెలిచిన..’ అని చెప్పిన దానం ఇప్పుడు సిగ్గు, శరం లేకుండా మాట్లాడటం తగదని మండిపడ్డారు. అందితే జుట్టు అందకపోతే కాళ్లు పట్టుకొనే రకం దానం అని ఎద్దేవా చేశారు. పార్టీ మారిన నేతలందరూ రాజీనామా చేసి మళ్లీ గెలవాలని సవాల్ చేశారు.
డీఎస్సీని వాయిదా వేయాలని, ప్రిపరేషన్కు అభ్యర్థులకు సమయం ఇవ్వాలని కౌశిక్రెడ్డి డిమాండ్ చేశారు. కేసీఆర్ పాలనలో 2.32 లక్షల ఉద్యోగాలు ఇచ్చారని, ప్రైవేట్ రంగంలో 10-12 లక్షల ఉద్యోగాలు సృష్టించారని చెప్పా రు. దేశంలోనే అత్యధిక ఉద్యోగాలను కేసీఆర్ కల్పించారని వివరించారు. దేశంలోని ఏ కాంగ్రె స్, బీజేపీ పాలిత రాష్ట్రంలో ఇంత పెద్దమొత్తంలో ఉద్యోగాలు ఇచ్చారా? అని నిలదీశారు. ఇలా ఇచ్చినట్టు నిరూపిస్తే తాను రాజీనామాకు సిద్ధమని సవాల్ విసిరారు. గ్రూప్-1 మెయిన్స్కు 1:100 నిష్పత్తిలో అభ్యర్థులను తీసుకోవాలని నాడు అసెంబ్లీలో డిమాండ్ చేసిన భట్టి విక్రమార్క ఇప్పుడు ఎందుకు అమలుచేయడం లేదని నిలదీశారు. సమావేశంలో బీఆర్ఎస్ రాష్ట్ర కార్యదర్శి రూప్సింగ్ పాల్గొన్నారు.